मुंबईतील थंडी गायब झाली असून तापमानाच्या वाढीमुळे मुंबईकरांवर जानेवारी महिन्यात घामाघूम होण्याची वेळ आली आहे. मंगळवारी मुंबईतील कमाल तापमानाचा पारा थेट ३५ अंश सेल्सिअसवर गेला होता. मुंबईत पुढील २४ तासांत सकाळी आकाश ढगाळलेले राहील, पण दुपारनंतर तापमानात वाढ होण्याची शक्यता आहे.
मुंबईत काही आठवड्यांपूर्वी किमान तापमान १२ अंश सेल्सिअसवर आले होते. थंडीमुळे मुंबईतील वातावरण आल्हादायक होते. मुंबईत काही काळासाठी धुक्याचा पडदाही निर्माण झाला होता. पण आता थंडी गायब झाली आहे. मंगळवारी सांताक्रूझ वेधशाळेने कमाल तापमान ३५.६ अंश सेल्सिअस, तर कुलाबा वेधशाळेने कमाल तापमान ३४ अंश सेल्सिअस नोंदवले. मागील २४ तासांत कमाल तापमानात झपाट्याने वाढ झाली आहे. एकीकडे तापमानात वाढ, तर दुसरीकडे आर्द्रतेत वाढ झाल्यामुळे मुंबईकरांवर घामाघूम होण्याची वेळ आली आहे. कुलाबा वेधशाळेने आर्द्रता ९० टक्के, तर सांताक्रूझ वेधशाळेने आर्द्रता ८३ टक्के नोंदवली.
आज, बुधवारी मुंबईत आकाश ढगाळलेले राहील. तसेच कोकण, गोवा, दक्षिण मध्य महाराष्ट्र व मराठवाड्यातही आकाश काही अंशी ढगाळलेले राहील. मात्र उत्तर महाराष्ट्रात पुढील ४८ तासांत रात्रीच्या तापमानात एक ते दोन अंश सेल्सिअसने घट होण्याची शक्यता प्रादेशिक हवामान विभागाने वर्तवली आहे