ऑस्ट्रेलियन ओपन टेनिस स्पर्धेला सुरुवात झाली अन् सोबत वादही सुरू झाले आहेत. एरव्ही मेलबर्नमधील उकाडा टेनिसपटूंचा घामटा काढतो; पण सोमवारी एका वेगळ्याच कारणाने अमेरिकेची टेनिसपटू कोको व्हँदवेघ भडकली. सामन्यांदरम्यान टेनिसपटू उर्जेसाठी केळी खातात; पण या केळ्यांचा तुटवडा कोकोच्या सामन्यादरम्यान झाला अन् तिचा पारा चढला. त्यात नियमभंग केल्यामुळे कोकोला दोनवेळा पंचांकडून ताकीद मिळाली.
एकीकडे पहिल्या दिवशी अमेरिकन ओपन विजेती स्लोअन स्टीफन, सात ग्रँडस्लॅम विजेती व्हीनस विल्यम्स, १६वा सीडेड जॉन इस्नर आठवा सीडेड जॅक सॉक असे भलेभले अमेरिकन गारद झाले. संध्याकाळच्या सत्रात इरिना फॉलकोनी आणि केव्हिन किंग यांची गारद अमेरिकन टेनिसपटूंमध्ये भर पडली. पहिल्या फेरीत यंदा १५ पैकी १२ अमेरिकन बाद झाले आहेत. दरम्यान कोकोने हंगेरीच्या टिमिया बाबोसचे आव्हान ७-६ (७-४), ६-२ असे परतवून लावले.
कोकोला पंचांकडून पहिली ताकीद मिळाली, जेव्हा तिने खेळाला सुरुवात करायला नकार दिला तेव्हा. पहिला सेट आटोपल्यानंतर झालेल्या विश्रांतीदरम्यान कोकोला केळी हवी होती; पण केळी संपल्याने तिला ती मिळाली नाहीत. तिने बॉलबॉयला केळी आणण्यास सांगितले. तसेच जोपर्यंत केळी येत नाहीत, तोपर्यंत सामन्याला सुरुवात करणार नाही, असा पवित्रा तिने घेतला. पंचांनी कोकोला खेळ सुरू करण्यास सांगितले; पण ती ऐकण्यास तयार नव्हती.अशी कशी कोर्टवर केळी उपलब्ध नव्हती? त्यात माझी काय चूक?’, असा नाराजी सूर कोकोने चेअरवरील पंचांकडे लावला. ‘माझ्यासाठी वेगळे नियम का? त्या क्षणी मला केळी हवी होती. जर कोर्टवरील आयोजनातच त्रूट असतील तर त्यात माझी चूक नाही’, असे कोकोने सांगितले. कोकोला दुसऱ्यांदा ताकीद मिळाली तेव्हा तिने बाबोससह वाद घालण्याचा प्रयत्न केला. याबाबत बाबोस म्हणालीः ‘ही कोको नेहमीच असे वागते. सामन्यादरम्यान रागाच्या भरात किमान दोन रॅकेट मोडणे तर नित्याचेच आहे. यावेळी तिने रॅकेटऐवजी नियम मोडले. माझा तर तिने अपमानच केला. पंचांनी कोकोचा तो संवाद ऐकायला हवा होता’.
-युकी पहिल्या फेरीत गारद
प्राथमिक फेरीचा अडथळा दूर करून आलेल्या भारताच्या युकी भांबरीची झुंज पहिल्या फेरीत संपुष्टात आली. सोमवारी सायप्रसच्या मार्कोस बघदातिसने युकीचे आव्हान ७-६ (७-४), ६-४, ६-३ असे परतवून लावले. आठ क्रमांकाच्या कोर्टवर पार पडलेली ही झुंज दोन तास, नऊ मिनिटे रंगली होती. २०१५मध्ये युकीला मरेने, तर २०१६मध्ये टॉमस बर्डिचने ऑस्ट्रेलियन ओपनच्या पहिल्या फेरीत नमवले होते. यंदा त्याला विजयाची संधी होती; पण टाळता येण्याजोग्या ३३ चुका युकीच्या अंगलट आल्या.