शाळेत आली नाही म्हणून पाचवीच्या विद्यार्थिनीला शिक्षिकाने मारहाण केली. पिंपरी-चिंचवड महापालिकेच्या शाळेत गुरुवारी (२१ डिसेंबर) हा प्रकार उघडकीस आला आहे. याबाबत शिक्षणाधिकाऱ्यांकडे तक्रार करण्यात आली आहे.
चिखली, जाधववाडी येथे पिंपरी-चिंचवड महापालिकेची साई जीवन प्राथमिक शाळा आहे. या शाळेत १० वर्षांची विद्यार्थिनी पाचवीच्या वर्गात शिकत आहे. पोटात दुखत असल्यामुळे ती दोन दिवस शाळेत जाऊ शकली नाही. गैरहजर राहिल्यामुळे शाळेतील शिक्षकांनी दोन विद्यार्थ्यांना तिच्या घरी चौकशीला पाठवले. या विद्यार्थ्यांबरोबर शाळेमध्ये आली असता संबंधित शिक्षकाने तिला गैरहजर राहण्याचे कारण विचारले आणि त्यानंतर तिला बेदम मारहाण केली. विद्यार्थिनीने घरी आल्यानंतर सर्व प्रकार आपल्या पालकांना सांगितला. त्यांनी त्वरित स्थानिक नगरसेवक राहुल जाधव यांच्या कार्यालयात जाऊन त्यांच्याकडे याबाबत तक्रार केली.
याबाबत पालिकेचे शिक्षण अधिकारी बी. एस. आवारी यांना विचारले असता ते म्हणाले, ‘त्या शाळेच्या मुख्याध्यापिका रजेवर आहेत. त्यामुळे अन्य एका शिक्षिकेकडे त्या शाळेचे कामकाज दिले असून मारहाण करणाऱ्या शिक्षकासह प्रभारी प्रमुखांकडे याबाबत चौकशी करण्यात येणार आहे.’