अल्पवयीन मुलींना फूस लावून त्यांना निर्जन स्थळी नेऊन त्यांच्यावर लैंगिक अत्याचार करणाऱ्या विकृत व्यक्तीने कोपरखैरणे भागातील आणखी एका १५ वर्षीय मुलीवर लैंगिक अत्याचार करून पलायन केल्याची घटना उघडकीस आली आहे. कोपरखैरणे पोलिसांनी या व्यक्तीविरोधात बलात्कार तसेच पोक्सो कायद्यानुसार गुन्हा दाखल करून त्याचा शोध सुरू केला आहे. या आरोपीने गेल्या सहा महिन्यांमध्ये खारघर भागातील तीन अल्पवयीन मुलींवर लैंगिक अत्याचार केले आहेत.
पीडित १५ वर्षीय मुलगी आई-वडील व भावंडासह कोपरखैरणे भागात रहाते. मुलीचे वडील टेलर असून त्यांचे दुकान घरापासून काही अंतरावर आहे. बुधवारी सांयकाळी ही मुलगी वडिलांच्या दुकानावरून जेवणाचा रिकामा डबा घेत घरी चालत येत असताना या व्यक्तीने पाठलाग करत तिचे घर गाठले. यावेळी मुलीच्या मोठ्या बहिणीने दरवाजा उघडल्यानंतर आरोपीने वडिलांनी शिवलेल्या उश्या घेण्यासाठी त्यांनी तिच्या लहान बहिणीला दुकानावर बोलावल्याचे सांगितले. त्याच्यावर विश्वास ठेवत तिने लहान बहिणीला लहान भावासोबत पाठवून दिले. त्यानंतर आरोपीने मुलीला व तिच्या भावाला अंधारात कोपरखैरणे बोनकोडे भागातील अर्धवट बांधकाम झालेल्या इमारतीवर नेले. त्यानंतर भावाला इमारतीच्या खाली थांबवून पीडित मुलीला वरच्या मजल्यावर नेत तिच्यावर लैंगिक अत्याचार करून पलायन केले. पीडित मुलीने भावासोबत घर गाठून घडल्या प्रकाराची माहिती दिल्यानंतर कोपरखैरणे पोलिसांनी गुन्हा दाखल केला. त्याचा शोध घेण्यासाठी तीन वेगवेगळी पथके पोलिसांनी तयार केली आहेत.