रोजच्या रोज लोकांच्या नजरा चुकवून लपून-छपून शेतावर जायचं, लाज मुठीत धरून उघड्यावरच शौचाला बसायचं… हे तिला नकोसं झालं होतं. आपल्या घरात किंवा अंगणात चार भिंतीचं शौचालय असावं असा तिचा हट्ट होता. घरच्यांना वारंवार सांगूनही त्यांनी मनावर घेतलं नाही. त्यामुळं वैतागलेल्या ‘तिनं’ आत्महत्या करून हा प्रश्न कायमचा निकाली काढला.
झारखंडमधील ढुमका इथं ही दुर्दैवी घटना घडली. घरात शौचालय नाही म्हणून खुशबू कुमारी या पदवीधर तरुणीनं स्वत:ला संपवून टाकल्याचं समोर आलं आहे. गोशाळा मार्गावरील घरात तिनं गळफास लावून घेतला. मिळालेल्या माहितीनुसार, ‘खुशबूला शौचासाठी उघड्यावर जायला आवडत नव्हतं. बऱ्याचदा ती जवळच राहणाऱ्या तिच्या आजोबांच्या घरच्या शौचालयात जायची. आपल्याही घरी एक शौचालय बांधा असा तगादा तिनं आई-वडिलांकडं लावला होता. पण त्यांनी केवळ एका भिंतीचा आडोसा उभा केला. खुशबूचे वडील श्रीपती यादव यांना मुलीच्या लग्नासाठी पैसे वाचवणं महत्त्वाचं वाटत होतं. पण खुशबूला ते मान्य नव्हतं. चार खोल्यांचं घर आणि विस्तीर्ण आंगण असतानाही आई-वडीलांनी शौचालयाला प्राधान्य देऊ नये हे तिच्या मनाला टोचत होतं. त्यातूनच तिनं हे टोकाचं पाऊल उचललं असावं, असं सांगण्यात येत आहे.