देशभर गाजत असलेल्या ई-पेट्रोल चोरीचे तार थेट नागपूरशी जुळले असल्याचे सोमवारी उघडकीस आली. ठाणे येथील गुन्हे शाखेने नागपूरच्या मानकापूर परिसरातील रबज्योत ऑटोमोबाइल्सवर छापा मारून, ईलेक्ट्रॉनिक चिपद्वारे होणारी पेट्रोल चोरी पकडली. शहरातील अजूनही काही पंपही पोलिसांच्या रडारवर असल्याची माहिती आहे.
एका इलेक्ट्रॉनिक चिपद्वारे सर्रास पेट्रोल चोरी होत असल्याची माहिती मिळाल्यानंतर लखनौ पोलिसांनी विवेक शेट्ये आणि अविनाश नाईक या दोघांना अटक केली होती. त्यानंतर या दोघांचे राज्यातील नेटवर्क पोलिसांच्या हाती लागले. आत्तापर्यंत महाराष्ट्रातील सव्वाशेहून अधिक ठिकाणी ही कारवाई करण्यात आली. याच मालिकेत नागपुरातसुद्धा ही कारवाई करण्यात आली. रबज्योत पेट्रोल पंपावरील ४ पेट्रोल डिन्सपेसर्सपैकी २ डिन्सपेसर्समध्ये ही चीप आढळून आल्या. हा पेट्रोल पंप नागपुरातील तुली कुटुंबियांच्या मालकीचा आहे. या प्रकरणी रामचंद्र टेकाडे (मेकॅनिक), मनिष वऱ्हाडे (मेकॅनिक) आणि क्लेफोर्ट थॉमस (वितरक) यांच्यावर गुन्हे दाखल करून त्यांना अटक करण्यात आली आहे. टेकाडे आणि वऱ्हाडे हे दोघे मेकॅनिक आहेत. टेकाडेचा स्वतःचा व्यवसाय असून या प्रकारच्या चीप्स बसवून देण्याचे काम करतो, असा आरोप त्याच्यावर लावण्यात आला आहे. तसेच वऱ्हाडे एका खासगी कंपनीमध्ये मेकॅनिक म्हणून कार्यरत आहे. त्याच्यावरसुद्धा ही चीप तयार करणे आणि ती लावून देणे असा आरोप लावण्यात आला आहे. क्लेफोर्ट थॉमस हा वितरक असून तोसुद्धा या नेटवर्क सामील असल्याचा आरोप त्याच्यावर लावण्यात आला आहे.
ठाणे गुन्हे शाखेचे उपायुक्त अभिषेक त्रिमुखे यांच्या नेतृत्वात सहायक पोलिस निरीक्षक अविराज कुराड आणि त्यांच्या चमुने ही कारवाई केली. यावेळी नागपूर पोलिसांच्या गुन्हे शाखेचे उपायुक्त संभाजी कदम, सहायक आयुक्त सोमनाथ वाघचौरे आणि पोलिस निरीक्षक प्रदीप अतुलकर यावेळी उपस्थित होते.
४४ पेट्रोलपंपावर छापे, ३० पंपावर फसवणूक
ठाणे : पेट्रोलपंप मशिनमधील पल्सरमध्ये छेडछाड करीत पेट्रोल आणि डिझेलचोरी करणाऱ्या पेट्रोलपंपाची संख्या वाढू लागली आहे. सात जिल्ह्यांतील ४४ पंपांवर टाकलेल्या छाप्यात ३० पंपांवर पेट्रोलची चोरी आढळून आली आहे. एकूण १४ जणांना अटक करण्यात आली असून, यामध्ये सहा टेक्निशियनचा समावेश आहे, अशी माहिती पोलिस उपायुक्त (गुन्हे) अभिषेक त्रिमुखे यांनी दिली. नागपूरमध्ये सोमवारी दोन पपंपांवर कारवाई झाली. गेल्या अकरा दिवसांत ठाण्यात २० पंप, नाशिक ९, रायगड ६, पुणे २, सातारा २, मुंबई २ आणि औरंगाबाद ३ अशा एकूण सात जिल्ह्यांतील ४४ पंपांवर छापे घालण्यात आले. १४ पंपांवर फसवणूक आढळली. तर उर्वरित ३० पंपांवर पेट्रोलची चोरी आढळून आली असून, सहा टेक्निशियन, पंप मालक आणि मॅनेजर आदी १४ जणांना अटक करण्यात आली आहे. यातील ७ आरोपींना न्यायालयीन कोठडी तर इतर ७ आरोपींना २८ जूनपर्यंत पोलिस कोठडी सुनावली आहे.