आधीच एसी बंद असल्यामुळे प्रवाशी संतप्त असताना गाडीचे इंजिनच डब्यांना मागे सोडून पुढे निघून गेल्याने प्रवाशांच्या संतापात आणखी भर पडण्याची घटना गुरुवारी राजधानी एक्सप्रेसबाबत घडली. राजधानी एक्सप्रेस ही रेल्वे बोर्डाची गाडी असल्याने प्रतिष्ठेची समजली जाते. मात्र, बल्लारपूरजवळ इंजिन पुढे निघून जाण्याचा प्रकार गुरुवारी सकाळी १०.३० च्या सुमारास घडला.
१२४३४ – निजामुद्दीन -चेन्नई राजधानी एक्स्प्रेस पहाटे ४.५५ वाजता नागपूर स्थानकावर आली आणि ५.३५ वाजता पुढील प्रवासाला निघाली. गाडीतील बी २ बोगीतील एसी बंद होता. गाडी तब्ब्ल ४० मिनिटे नागपुरात थांबील पण एसी दुरुस्त झाला नाही. गाडीत अस्वच्छताही होती. वास्तविक ही गाडी स्वच्छता तसेच तेथील सेवेसाठी ओळखली जाते. त्यामुळे या गाडीचे तिकीट दरही जास्तीचे असतात. गाडीतील एक प्रवासी डॉ. महाकाळकर यांनी अटेन्डंट, टीसी या साऱ्यांकडे एसी बंद असल्याची तक्रार केली. मात्र उपयोग झाला नाही. किमान बल्लारशा स्थानकावर एसी दुरुस्त होईल,, असे वाटत होते. मात्र, तेथेही काहीच हालचाल नसल्याचे पाहून प्रवाशांनी गोंधळ घातला. त्यावेळी डॉ. महाकाळकर यांनी बल्लारशा स्थानकावर लेखी तक्रार दिली. शेवटी एसी सुरू न होताच ही गाडी पुढे निघाली आणि काही अंतर जात नाही तोच कपलिंग तुटल्याने गाडीचे इंजिन एकटेच पुढे निघाले. २ ते ३ कि.मी. दूर गेल्यावर लोकोपायलटच्या हा प्रकार लक्षात आला. त्यानंतर इंजिन मागे घेण्यात आले व पुन्हा डब्यांना जोडून ही गाडी पुढे रवाना झाली.