अंडरवर्ल्ड डॉन दाऊद इब्राहिमचा कट्टर शत्रू असलेल्या छोटा राजनला कायमचा संपवण्याचा दाऊदचा ‘फुलप्रूफ प्लान’ पुन्हा एकदा फसला आहे. राजनला संपवण्याची डॉनची ‘तमन्ना’ पूर्ण करण्यासाठी त्याचा खास ‘पंटर’ छोटा शकीलनं हा प्लान आखला होता. राजनचा ठावठिकाणा मिळवून त्याचा गेम करण्यासाठी शूटरही पाठवले. पण, अखेरच्या क्षणी टिप मिळाल्याने राजन अंडरग्राउंड झाला आणि हा प्लान फसला.
गेल्या एप्रिल महिन्यात कराचीतून भारतात एका विशिष्ट क्रमांकावर अनेकदा फोनाफोनी झाली. नेपाळमध्ये नोंद असलेल्या 00971504 या WLL नंबरवरून हे कॉल गेले होते. छोटा शकील राजनच्या एका विश्वासू माणसाला गळाला लावण्याचा प्रयत्न करतानाचे हे संभाषण आहे. शकीलच्या सतत मागावर असलेल्या गुप्तचर यंत्रणांनी हिंदी व ऊर्दूतील हे संभाषण टॅप केले आहे. ‘टाइम्स ऑफ इंडिया’च्या हाती लागलेल्या या संभाषणावरून शकीलचा हात छोटा राजनच्या गळ्यापर्यंत जवळपास पोहोचल्याचे समोर आले आहे.
‘राजन हा आपल्या सर्वांची बदनामी करून स्वत: देशभक्त असल्याचे भासवतो. गेल्या वेळी तो थोडक्यात वाचला. पण यावेळी त्याचा ‘गेम’ वाजवल्याशिवाय राहणार नाही. तू फक्त आम्हाला छोटीशी मदत कर. त्याचा पत्ता सांग. डॉन तुला खूष करून टाकेल. तुला मोठं इनाम दिलं जाईल ही माझी जबान आहे. अंडरवर्ल्डमध्ये आता फक्त ‘डी’ कंपनीचीच चालते. आमच्याकडेच पॉवर आहे. राजनला आयुष्यभर लपत-छपतच जगावं लागणार आहे. तू विश्वास ठेव. मदत केलीस तर तुझा पूर्ण खयाल ठेवला जाईल,’ असं बोलून शकील राजनच्या साथीदाराला आपल्या बाजूला वळवण्याचा प्रयत्न करत होता. शकीलच्या सततच्या प्रयत्नांमुळं अखेर राजनचा माणूस फुटला आणि त्यानं राजनचा ऑस्ट्रेलियातील न्यूकॅसल येथील नेमका ठावठिकाणा सांगितला.
राजनचा पत्ता मिळताच शकीलनं तत्काळ अरब देशांतून काही शार्प शूटर ऑस्ट्रेलियात धाडले. कोणत्याही परिस्थितीत राजन संपला पाहिजे, अशा सूचनाच त्यानं शूटर्सना दिल्या. शकीलच्या जय्यत तयारीमुळं यावेळी राजन वाचण्याची शक्यता नव्हती. पण राजनच्या एका हितचिंतकाला या प्लानची खबर लागली. त्यानं लगेच राजनला सावध केलं. त्यानंतर काही तासांतच राजन अंडरग्राउंड झाला आणि ऑस्ट्रेलियाबाहेर पसार झाला.
वाढत्या वयामुळं गेल्या काही वर्षांत छोटा राजन टोळीच्या गुन्हेगारी कारवाया मंदावल्या आहेत. त्याच्यापासून दाऊदच्या साम्राज्याला आता तितकासा धोका उरलेला नाही. मात्र, दाऊद टोळीचा त्याच्यावरील खुन्नस कायम आहे. राजनला संपवायचाच हा दाऊदचा निर्धार अजूनही पक्का आहे. तसे प्रयत्न याआधीही अनेकदा झाले आहेत. २००० साली बँकॉक येथील एका मार्केटमध्ये दाऊदच्या माणसांनी राजनवर गोळीबार केला होता. त्यात तो गंभीर जखमी झाला होता. आजही तो त्यातून पू्र्णपणे बरा होऊ शकलेला नाही. तेव्हापासून त्याच्याभोवती कायम सुरक्षेचं कडं असतं. १५ वर्षांनतर शकील हे अभेद्य कडं भेदण्यात यशस्वी झाला खरा, पण राजनपर्यंत पोहोचू शकला नाही.