मुंबई उच्च न्यायालयात खूप काम करण्यासाठी प्रसिद्ध असलेले न्यायाधीश एस. जे. काथावाला यांनी बुधवारी अक्षरशः ‘रेकॉर्डब्रेक’ काम केले. सकाळी १० ते संध्याकाळी ७ पर्यंत अगदी नैसर्गिक विधीसाठीही विश्रांती न घेता काम केले. त्यांच्या या अविश्रांत कामाबद्दल न्यायालयात कौतुकास्पद चर्चा होत आहे.
न्या. काथावाला भरपूर काम करण्यासाठी प्रसिद्ध आहेत. न्या. काथावाला यांनी बुधवारी सकाळी १०च्या सुमारास आधी आपल्या चेंबरमध्ये काही प्रकरणांची सुनावणी घेतली आणि नंतर ११.४५पासून न्यायालयात संध्याकाळी ७ वाजेपर्यंत सलग बसून अनेक प्रकरणांची सुनावणी घेतली. अनेक प्रकरणांत त्यांनी आदेशही दिले. यावेळी त्यांच्या न्यायालयातील काही कर्मचाऱ्यांनीही त्यांना साथ दिली. काहींना दुपारचे जेवणही घेता आले नाही. न्यायमूर्तींनी अगदी दुपारच्या जेवणासाठी किंवा नैसर्गिक विधीसाठीही ‘ब्रेक’ घेतला नाही, अशी माहिती काही कर्मचा-यांनी व प्रत्यक्षदर्शींनी दिली.