शरीराला दुखापत झाली, मुका मार लागला की मालीश केले जाते. पण दुखऱ्या भागावर केलेले हे मालीश प्राणावरही बेतू शकते. दिल्लीतल्या एका आईने आपल्या मुलाला केलेल्या अशा मालीशमुळे मुलाचा मृत्यू ओढवल्याची धक्कादायक घटना घडली आहे.
त्याचं झालं असं, या २३ वर्षांच्या युवकाला बॅडमिंटन खेळताना पायाच्या घोट्यात दुखापत झाली. त्यानंतर त्या पायाला प्लास्टरही करण्यात आहे. पण त्याच्या रक्तवाहिनीत गुठळी झाल्याचे डॉक्टरांनी केलेल्या चाचणीत लक्षात आले. नंतर पाच-सहा दिवसांनी त्याला अचानक बेशुद्धावस्थेत पुन्हा रुग्णालयात आणण्यात आले. खूप प्रयत्न करूनही डॉक्टरांना त्याला शुद्धीत आणता आले नाही आणि त्याचे निधन झाले. पोस्टमार्टेम रिपोर्टनुसार, त्याच्या पायातली ती ५ सेंमीची गुठळी पायातल्या रक्तवाहिनीतून फुफ्फुसाला रक्तपुरवठा करणाऱ्या धमणीत गेल्यामुळे फुफ्फुसात होणारा रक्तपुरवठाच थांबला आणि त्याचा मृत्यू ओढवला.
शवविच्छेदन करणाऱ्या चित्तरंजन बेहेरा यांनी सांगितले, ‘फ्रॅक्चरनंतर रक्ताची गुठळी होणे सामान्य बाब आहे, पण यामुळे रुग्णाचा मृत्यू होत नाही. या युवकाला ३१ ऑक्टोबरला एम्स रुग्णालयात आणले तेव्हा तो बेशुद्ध होता. त्याला शुद्धीत आणता आले नाही. नंतर कळले की त्याच्या आईने त्याला अर्धा तास मसाज केला होता. त्यानंतर त्याच्या गुडघ्यात जोरात कळ आली आणि तो बेशुद्ध पडला. धमणीतला रक्तप्रवाह थांबल्यामुळे असे घडते.’
एम्स रुग्णालयाचे फॉरेन्सिक मेडिसीनचे प्रमुख डॉ. सुधीर गुप्ता यांनी सांगितले, ‘जास्त वेळ जोर लावून मसाज करणं घातक ठरू शकतं. असा प्रकार १ लाखातल्या ७० रुग्णांच्या बाबतीत घडू शकतो. वयोवृद्ध किंवा नशेत असणाऱ्यांच्या बाबतीतही असं घडू शकतं.’