प्रेयसीने नोकरी करू नये या क्षुल्लक कारणावरून झालेल्या वादात तरुणाने आरे कॅालनीत गुरुवारी प्रेयसीच्याच ओढणीने गळफास घेऊन आत्महत्या केली. आसिफ शेख (२१) असे या मृत तरुणाचे नाव आहे. या प्रकरणी आरे पोलिस ठाण्यात गुन्ह्याची नोंद करण्यात आली आहे.
कुर्ला येथील जरीमरी परिसरात आसिफ शेख त्याच्या कुटुंबीयांसोबत राहत होता. आसिफची प्रेयसी शबाना (बदललेले नाव) हिच्या आई-वडिलांचा घटस्फोट झाल्याने शबाना दोन लहान बहिणी आणि आईसह त्याच परिसरात राहते. मागील तीन वर्षांपासून दोघांमध्ये प्रेमसंबंध होते. घरी कुणीच कमवते नसल्यामुळे शबानाला लहान वयात काम करावे लागत होते. त्यातच आसिफ शबानावर संशयही घ्यायचा. यावरून दोघांमध्ये वारंवार वाद होत होते. दरम्यान, गुरुवारी सकाळी कामावर निघालेल्या शबानाचा आसिफ पाठलाग करत अंधेरीला पोहोचला. त्यानंतर त्याने शबानाची वाट अडवत कामावर न जाता फिरायला येण्यासाठी तगादा लावला. तेव्हा शबाना आणि आसिफ आरे कॉलनीत फिरायला गेले. त्यावेळी दोघांमध्ये कामावर न जाण्यावरून पुन्हा वाद झाला. त्यावेळी शबाना ऐकत नसल्याने आसिफने तिला मारहाण केली. त्यामुळे रागात शबाना दुसरीकडे निघून जात होती. त्यावेळी आसिफने तिच्या गळ्यातील ओढणी खेचून न ऐकल्यास आत्महत्या करीन अशी धमकी दिली. मात्र त्याकडे दुर्लक्ष करत शबाना पुढे निघून आली. त्यावेळी आसिफने जंगलातील एका झाडाला ओढणीच्या मदतीने गळफास घेतला. आसिफला पाहण्यासाठी शबाना मागे गेल्यानंतर तिने आसिफने गळफास घेतल्याचे पाहून आरडाओरडा केला. त्यावेळी आरे पोलिसांनी घटनास्थळी धाव घेऊन आसिफला रुग्णालयात नेले. मात्र डॅाक्टरांनी आसिफला मृत घोषित केले. या प्रकरणी पोलिसांनी गुन्ह्याची नोंद केली असल्याची माहिती विजय ओऊलकर यांनी दिली.