उन्हाचा चटका वाढला असला, तरी ‘स्वाइन फ्लू’चा संसर्ग कमी झालेला नाही. नगर जिल्ह्यातील अडीच वर्षांच्या एका मुलीचा पुण्याच्या खासगी हॉस्पिटलमध्ये बुधवारी सकाळी संसर्गाने मृत्यू झाला. आतापर्यंत पुण्यात दगावलेल्यांची संख्या ३३ पर्यंत पोहोचली आहे. एच१ एन१ या विषाणूच्या संसर्गाने त्या मुलीला न्यूमोनिया झाला. परिणामी तिचा श्वास व हृदय बंद पडल्याने तिचा मृत्यू झाल्याचे निरीक्षण आरोग्य खात्याने नोंदविले आहे.
शहरात महापालिकेच्या आरोग्य खात्याच्या विविध दवाखान्यांमध्ये ‘स्वाइन फ्लू’च्या पेशंटना तपासण्याची सोय करण्यात आली आहे. त्या ठिकाणी दवाखान्यात लक्षणे दिसणाऱ्या पेशंटना तातडीने स्वाइन फ्लूचे ‘टॅमी फ्लू’ नावाचे औषध मोफत देण्याची सोय करण्यात आली आहे. नागरिकांनी लक्षणे दिसताच सरकारी दवाखान्यात जाऊन तपासणी व औषधोपचार सुरू करावेत, असे आवाहन आरोग्य विभागाने केले आहे.
पुण्यात आणखी १८ पेशंटची प्रकृती खालावली आहे. त्यांना व्हेंटिलेटरवर ठेवण्यात आले आहे. नव्याने तिघांना लागण झाली आहे. आतापर्यंत शहरात १९९ जणांना स्वाइन फ्लूचा संसर्ग झाल्याचे निदान झाले असून ३३ जणांचा बळी गेल्याची नोंद केली आहे.