मोबाइलवरील अतिप्रेमापोटी आणि घरातील कडक वातावरणामुळे रागाच्या भरात दोन चुलतबहिणींनी आत्महत्येचा प्रयत्न केला. ही घटना बुधवारी दुपारी १२.३० ते १ वाजताच्या सुमारास फुटाळा तलावावर (नागपूर) घडली. या घटनेमुळे एकच खळबळ उडाली. उपस्थित नागरिकांनी दाखविलेल्या तत्परतेने या मुलींचा जीव वाचला.
या दोघी चुलतबहिणी सदर पोलिस ठाण्याच्या हद्दीतील रहिवासी आहेत. ही दोन्ही कुटुंबे आजूबाजूलाच राहतात. त्या दोघी एकाच वयाच्या असून, जायाभाई ज्ञानपीठ कॉलेजमध्ये इयत्ता अकरावीला शिकतात. या मुलींच्या कुटुंबातील वातावरण अत्यंत कडक असल्याचे बोलले जाते. तसेच कॉलेजमधील मित्र-मैत्रिणींकडे मोबाइल बघून या दोघींनीसुद्धा घरी चांगल्या आणि महागड्या मोबाइलकरिता हट्ट केला होता, असे समजते. परंतु, घरच्यांनी त्याकरिता नकार दिल्याने या दोघी निराश होत्या. या नैराश्यात आणि रागाच्या भरात त्यांनी एकत्रित आत्महत्या करण्याचा निर्णय घेतला. दुपारी साडेबाराच्या सुमारास त्या फुटाळा तलावावर आल्या. तेथे त्या सिगारेट ओढत होत्या, असेही काही जणांनी सांगितले. दोघींनी अचानक तलावात उडी घेतली. ही बाब लक्षात येताच तेथे उपस्थित असलेल्या काही मुलांनीसुद्धा तलावात उड्या टाकल्या आणि या मुलींचा जीव वाचविला.
पोलिसांनी काढली समजूत
घटनेची माहिती मिळताच अंबाझरी पोलिसांचा ताफा घटनास्थळी पोहोचला व दोन्ही मुली सुखरूप असल्याची खात्री करून घेतली. त्यांच्या पालकांना बोलाविण्यात आले. वरिष्ठ पोलिस निरीक्षक अतुल सबनवीस यांनी मुली आणि पालकांची समजूत काढली, आणि दोन्ही मुलींना त्यांच्या पालकांच्या स्वाधीन केले.