रुग्णांच्या नातेवाईकांकडून वाढत्या हल्ल्यांच्या निषेधार्थ डॉक्टरांनी पुकारलेल्या संपाचा आज, बुधवारीही तीव्र फटका रुग्णसेवांना बसला. उस्मानाबाद, जालना, भुसावळ, बीड यासारख्या दूरच्या ठिकाणांहून मुंबईच्या पालिका रुग्णालयांमध्ये आशेने आलेल्या रुग्णांना ताटकळत बसण्याशिवाय पर्याय राहिला नाही. आप्तकालीन आणि प्रसूती विभागातील वैद्यकीय सुविधा दिल्या जातील, असे आश्वासन डॉक्टरांकडून दिले गेले होते. प्रत्यक्षात केईएम, सायन, नायर यांसारख्या रुग्णालयांतील काही रुग्णांना तुमच्या जबाबदारीवर दाखल करा, असे सांगण्यात आले. त्यामुळे हतबल झालेल्या अनेक रुग्णांच्या नातेवाईकांनी फोनाफोनी करून उधारी घेत परिसरातील खासगी रुग्णालयांची वाट पकडली.
पास प्रक्रिया सुरू
रुग्णालयात रुग्णांच्या नातेवाईकांना प्रवेशासाठी पास देण्याचे आदेश दोन दिवसांपूर्वी पालिका आयुक्त अजय मेहता यांनी दिले होते. ती प्रक्रिया बुधवारी केईएम रुग्णालयात सुरू झाली. प्रत्येक रुग्णाच्या नातेवाईकांना एकच पास देण्यात आला होता.