व्हॅलेंटाईन डेला आपल्या प्रेयसीसाठी काहीतरी हटके करण्याचा प्रयत्न एका प्रियकराच्या अंगलट आला आहे. त्याने केलेल्या कृत्यामुळे संबंधित प्रियकराला पोलीस कोठडीची हवा खावी लागली असून, त्याच्या प्रेमाची हवाच गुल झालीये. आपल्या प्रेयसीला वेगळ्या स्वरुपाचे गिफ्टे देण्यासाठी प्रियकराने एका गाडीला २००० रुपयांच्या नोटा लावल्या होत्या. पण अशा पद्धतीने देशातील चलनाचा गैरवापर केल्यामुळे प्रियकराविरोधात मुंबईतील पोलीस ठाण्यात गुन्हा दाखल करण्यात आला आहे.
प्रियकराने ही गाडी मंगळवारी सकाळी मुंबईतील रस्त्यावर आणल्यानंतर लोकांचे त्याकडे लक्ष वेधले गेले. होंडा कंपनीच्या या गाडीवर सर्व ठिकाणी २००० रुपयांच्या नोटा लावल्या होत्या. ही गाडी रस्त्यावर आल्यानंतर लगेचच पोलिसांनी हस्तक्षेप करून गाडी बाजूला घेतली आणि गाडीच्या चालकाला ताब्यात घेतले. पोलिसांनी अधिक चौकशी केल्यावर त्याने प्रेयसीला व्हॅलेंटाईन डेचे गिफ्ट म्हणून अशा पद्धतीने गाडीवर नोटा लावल्याचे त्याने सांगितले. पण देशातील कायदेशीर चलनाचा गैरवापर केल्यामुळे पोलिसांनी संबंधित तरुणाला अटक केली आहे. ही घटना मुंबईत घडली असली, तरी अटक करण्यात आलेल्या युवकाचे नाव काय, हे अद्याप स्पष्ट झालेले नाही.