अमेरिकेतील दहा डॉलरच्या नोटेवरील अलेक्झांडर हॅमिल्टन यांची जागा आता एक महिला घेणार आहे. अमेरिकेचे अर्थमंत्री जेकब ल्यू यांनी याबाबतची घोषणा केली असून, २०२० मध्ये ही नोट अमेरिकेच्या बाजारपेठेत येणार आहे. या निर्णयामुळे गेल्या शंभर वर्षांत पहिल्यांदाच डॉलरच्या नोटेवर महिला दिसणार आहे.
गेल्या शंभर वर्षांत अमेरिकेत डॉलरच्या कोणत्याही नोटेवर महिलेचे चित्र नव्हते. त्यामुळे नोटेवर महिलेचे चित्र असावे, यासाठी अमेरिकेत अनेक संघटना काम करत होत्या. महिलेच्या छायाचित्रासह नोट छापण्याचा निर्णय सरकारने घेतलेला असला, तरी कोणाचे चित्र किंवा छायाचित्र असेल, याबाबत अद्याप निर्णय झालेला नाही. यासाठी thenew10.treasury.gov या वेबसाइटवर या संदर्भात मते नोंदविण्याचे आवाहन ल्यू यांनी केले.
अलेक्झांडर हॅमिल्टन अमेरिकेचे पहिले अर्थमंत्री होते. त्यामुळे दहा डॉलरच्या नोटेवरून त्यांना हटविणे देखील सरकारला जड जात आहे. त्यामुळेच नव्याने छपाई करण्यात येणाऱ्या नोटांपैकी काही नोटांवर हॅमिल्टन यांच्या चित्राचा भाग तसाच कायम ठेवण्याचा विचार असल्याचे ल्यू यांनी सांगितले.
आणखी एक चळवळ
वीस डॉलरच्या नोटेवर महिलेचे चित्र असावे, या मागणीसाठी द न्यू हॅम्पशिअरच्या सिनेटर जेनी शाहीन यांनी चळवळ उभी केली आहे. त्यांनी ल्यू यांच्या घोषणेचे स्वागत केले आहे. ‘तरुणींना नोटेवर महिलेचे चित्र पाहून प्रेरणा मिळेल,’ अशी अपेक्षा शाहीन यांनी व्यक्त केली आहे. सध्या २० डॉलरच्या नोटेवर अॅन्ड्रू जॅकसन यांचे चित्र आहे. या नोटेच्या बदलासाठी शाहीन यांनी घेतलेल्या ऑनलाइन कॅम्पेनमध्ये अफ्रिकन मानवतावादी कार्यकर्त्या हर्रेट टबमन यांना अधिक पसंती मिळत आहे.