एअर इंडियाच्या विमानातील प्रवासादरम्यान एका प्रवाशाला देण्यात आलेल्या जेवणात पाल मिळाल्यानं सरकारी विमान कंपन्यांतील अन्नाच्या सुरक्षेवर प्रश्नचिन्ह निर्माण झालं आहे. या प्रकारामुळं संतप्त झालेल्या प्रवाशानं कंपनीच्या व्यवस्थापनाकडे तक्रार केली आहे.
एअर इंडियाचं ‘एआय-१११’ हे विमान दिल्लीहून लंडनकडे निघालं होतं. दिल्लीतील इंदिरा गांधी आंतरराष्ट्रीय विमानतळावरून उड्डाण केल्यानंतर साधारण एक वाजण्याच्या सुमारास विमानातील कर्मचाऱ्यांनी प्रवाशांना स्नॅक्स देण्यास सुरुवात केली. यावेळी एका प्रवाशानं मागवलेल्या बर्गरमधून एक पाल सरपटत बाहेर आली. हा किळसवाणा प्रकार पाहून प्रवासी चांगलाच संतापला. त्यानं लगेचच ती पाल आणि बर्गर कर्मचाऱ्याला दाखवला. ‘केबिन क्रू’ सदस्यांनी ती प्लेट बदलून देण्याची तयारी दाखवली. पण संतापलेल्या प्रवाशानं तसं करण्यास नकार दिला. त्यानं याबाबत एअर इंडियाच्या व्यवस्थापनास तक्रार केली असून कारवाईची मागणी केली आहे.