बॉलिवूडमधील ज्येष्ठ गीतकार जावेद अख्तर यांनी भूमाता ब्रिगेड संघटनेच्या तृप्ती देसाई यांना आपला पाठिंबा जाहीर करत महिलांना हाजी अली दर्ग्यात प्रवेश दिला जावा, अशी भूमिका घेतली आहे. जावेद अख्तर यांनी आपल्या ट्विटर अकाऊंटवरून ट्विट करून तृप्ती देसाई यांना ‘सॅल्युट’ ठोकला.
शनि शिंगणापूर, त्र्यंबकेश्वर मंदिर आणि कोल्हापूर अंबाबाई मंदिर गाभाऱ्यातील महिलांसाठीची प्रवेशबंदी झुगारणाऱ्या तृप्ती देसाई यांचा हाजी अली दर्ग्यातील प्रवेश गुरुवारी प्रचंड विरोधामुळे शक्य होऊ शकला नाही. ‘हाजी सबके लिए’ या फोरमच्या माध्यमातून आंदोलन सुरू आहे. देशभरातातून विविध प्रतिक्रिया येत आहेत. अशातच जावेद अख्तर यांनी शुक्रवारी या संदर्भात ट्विट केले.
‘सामाजिक कार्यकर्त्या असलेल्या तृप्ती यांनी मंदिर आणि दर्गा असा कोणताही भेद पाळला नाही. त्यामुळे धर्मनिरपेक्ष अशा महिला कार्यकर्त्या तृप्ती देसाई यांना माझा सलाम’, असे जावेद अख्तर यांनी ट्विट केले. त्यांच्या या ट्विटवर सोशल मीडियातून प्रचंड प्रतिक्रिया आल्या. अनेकांनी त्यांच्या भूमिकेचे स्वागत केले. याआधी देखील राज्यसभेतील भाषणातून आपण ‘भारत माता की जय’ म्हणणारच अशी ठाम भूमिका घेत त्यांनी ओवैसी यांना प्रत्युत्तर दिले होते.