राज्यातील दहावीच्या विद्यार्थ्यांचा ऑनलाइन निकाल आज (८ जून) दुपारी १ वाजता जाहीर होणार आहे. www.mahresult.nic.in, www.maharashtraeducation.com, www.hscresult.mkcl.org, www.rediff.com/exams, www.knowyourresult.com/MAHSSC या वेबसाइट्सवरून महाराष्ट्र राज्य माध्यमिक आणि उच्च माध्यमिक शिक्षण मंडळ (राज्य बोर्ड) अधिकृतपणे हा निकाल उपलब्ध करून देणार आहे.
गेल्या वर्षी दहावी आणि बारावीच्या टक्केवारीने नव्वदीच्या पार मजल मारली होती. त्या पाठोपाठ यंदा नुकत्याच जाहीर झालेला बारावीचा निकाल गेल्या वर्षीची टक्केवारीही मागे टाकत ९१ टक्क्यांवर स्थिरावला होता. दहावीच्या निकालाबाबतही हिच परिस्थिती निर्माण होण्याची शक्यता सध्या व्यक्त केली जात आहे.
राज्य बोर्डाने प्रसिद्धीस दिलेल्या पत्रकानुसार, सोमवारी ऑनलाइन निकालामध्ये विद्यार्थ्यांना विषयनिहाय गुण उपलब्ध करून दिले जाणार आहेत. विद्यार्थ्यांना निकालाची प्रिंट आउटही घेता येईल. विद्यार्थ्यांना ‘एसएमएस’च्या माध्यमातूनही निकाल जाणून घेता येईल. विद्यार्थ्यांना त्यांच्या शाळांमधून येत्या १५ जूनपासून छापील गुणपत्रिकांचे वाटप केले जाणार आहे.