पाकिस्तानी नेत्यांची विचारसरणी कुठल्या थराला जाऊ शकते याचं आणखी एक उदाहरण समोर आलं आहे. पाकच्या संसदेतील एका सदस्याने पंतप्रधान नरेंद्र मोदींच्या अटकेसाठी १०० कोटींचे इनाम जाहीर केले आहे. पाकव्याप्त काश्मीरमधील रावळकोटचे जमात-ए-इस्लामीचे प्रमुख सिराज उल हक यांनी ही घोषणा केली आहे. हक पाकच्या संसदेतील वरिष्ठ सभागृहाचे सदस्य आहेत. आणि भारताच्या जम्मूतील पुंछपासून २०० किलोमीटर अंतरावर रावळकोट आहे.
हकने गरळ ओकली
‘मोदी सलाउद्दीनला अटक करू शकत नाही. आम्ही तुमचे दात पाडू. सलाउद्दीनच्या अटकेसाठी ५० कोटींचा इनाम देता. पण आता मीही सांगतो. जो कोणी मोदींना अटक करेल त्याला आम्ही १०० कोटी रूपये देऊ.’
भारताशी मैत्री अशक्य
‘काश्मीरी नागरिकांच्या स्वातंत्र्यात भारत सर्वात मोठा अडथळा बनला आहे. त्यामुळे भारत-पाकिस्तानची मैत्री कधीच होऊ शकणार नाही. ज्यांना मैत्री हवी आहे त्यांनी भारतात जावं.’
मोदीच जबाबदार
‘काश्मीर आणि गुजरातमधील नागरिकांच्या हत्यांना मोदीच जबाबदार आहे. पाकिस्तान सरकारनेही काश्मीरमध्ये नागरिकांवर होत असलेल्या अत्याचाराकडे कानाडोळा केला आहे. काश्मीर स्वतंत्र होईल तेव्हाच भारताशी मैत्री शक्य आहे.’ हक यांनी केलेल्या या वादग्रस्त वक्तव्यावरून पाकिस्तानातूनच त्यांना विरोध होऊ लागला आहे. हक यांच्याकडे एवढा पैसा आहे तर त्यांनी नागरिकांच्या विकासासाठी खर्च करावा. त्यांच्यासाठी रुग्णालयं आणि मुलांसाठी शाळा सुरू कराव्यात, असं ट्वीट पाक पत्रकार मेहर तरारने केलंय.