“टोलमुक्त महाराष्ट्र‘ अशी घोषणा केल्यानंतर राज्य सरकारने उद्या (ता. 31) मध्यरात्रीपासून बारा टोल नाके पूर्णपणे बंद करण्याचा, तर 53 टोल नाक्यांवर कार, जीप व एसटी बसना सूट देण्याच्या निर्णयावर आज शिक्कामोर्तब केले. यामुळे राज्यातील 12 टोल नाक्यांना एक जूनपासून कुलूप लागणार आहे. तर 53 पथकर स्थानकांवर कार, जीप व एसटी बसेसना टोलमुक्ती मिळणार असल्याची माहिती सार्वजनिक बांधकाममंत्री चंद्रकांत पाटील यांनी दिली. याबाबतची अधिसूचना राज्य सरकारने आज जारी केली आहे.
त्याचप्रमाणे सार्वजनिक बांधकाम विभागाकडील उर्वरित 27 टोल नाके व रस्ते विकास महामंडळाकडील 26 टोल नाके अशा एकूण 53 टोल नाक्यांवर कार, जीप व एसटी बसेसना सूट देण्याची घोषणा मुख्यमंत्र्यांनी केली होती.
बंद होणारे टोल नाके
1) वडखळ : अलिबाग-पेण-खोपोली
2) शिक्रापूर : वडगाव-चाकण-शिक्रापूर
3) मोहोळ : मोहोळ-कुरूल-कामती-मंद्रुप
4) डोंगर : वडगाव-चाकण-शिक्रापूर
5) कुसळंब : टेंभुर्णी-कुर्डुवाडी-बार्शी-लातूर
6) अकोले (खु) : नगर-करमाळा-टेंभुर्णी
7) सप्तशृंगी : नाशिक-दिंडोरी-वणी-नांदूरी-सप्तशृंगीगड
8) नांदुरी : नाशिक-दिंडोरी-वणी-नांदूरी-सप्तशृंगीगड
9) ढकांबे : नाशिक-दिंडोरी-वणी-नांदूरी-सप्तशृंगीगड
10) तापी पूल : भुसावळ-यावल, भुसावळ-अमोदा-न्हावी, अमोदा-फैजपूर
11) रावणटेकडी : खामगाव (बुलडाणा) बाह्य वळण रस्ता
12) तडाली : रेल्वे ओव्हर ब्रिज तडाली (चंद्रपूर)