तमिळनाडूतील एका मंदिरात ‘मोक्ष मार्गम’ या अरुंद मार्गात अडकून एका व्यक्तीचा मृत्यू झाल्याच्या घटनेनंतर काही दिवसांनी, त्याच ठिकाणी काही महिन्यांपूर्वी आणखी एका भाविकाची बाहेर पडण्यासाठी झालेली धडपड दर्शवणारा एक अंगावर काटा आणणारा व्हिडिओ पुन्हा समोर आला आहे. ‘द हिंदू’च्या वृत्तानुसार, आंध्र प्रदेशातील 36 वर्षीय मणिकुमार यांचा 24 जुलै रोजी अण्णामलैयार मंदिराच्या तीर्थयात्रेदरम्यान अरुणाचल गिरीच्या दक्षिण मार्गावरील खडकांच्या अरुंद मार्गातून सरपटत जाण्याचा प्रयत्न करताना मृत्यू झाला होता. त्यानंतर हा व्हिडिओ पुन्हा चर्चेत आला आहे.
मणिकुमार त्या अरुंद जागेत अडकले आणि त्यांना लवकरच श्वास घेण्यास तीव्र त्रास होऊ लागला होता. अग्निशमन व बचाव दलाच्या जवानांनी स्थानिक भाविकांच्या मदतीने त्यांना बाहेर काढले होते. मात्र, रुग्णालयात नेल्यानंतर त्यांना मृत घोषित करण्यात आले. या दुर्दैवी घटनेची बातमी पसरताच, त्या घटनेच्या काही महिने आधीचा एक व्हिडिओ सोशल मीडियावर मोठ्या प्रमाणावर व्हायरल होऊ लागला.