नाशिक जिल्ह्यातील भाविकांच्या बसला कानपूरजवळ (उत्तर प्रदेश) आज पहाटे अपघात झाला. या अपघातात एका भाविकाचा मृत्यू झाला असून वाहनचालक गंभीर जखमी आहेत. तर काही भाविक किरकोळ जखमी असून त्यांना कानपूर येथील शासकीय वैद्यकीय महाविद्यालय व रुग्णालयात उपचारासाठी दाखल करण्यात आलं आहे. या अपघाताची माहिती मिळताच नाशिकचे जिल्हाधिकारी आयुष प्रसाद यांनी कानपूर येथील प्रशासनाशी संपर्क साधत भाविकांना सर्वतोपरी सहकार्य करण्याची विनंती केली.
नाशिक जिल्ह्यातील ओझर, पिंपळगाव, मालेगाव परिसरातील सुमारे ५० भाविक उत्तर भारतात तीर्थयात्रेसाठी खासगी बसने गुरूवारी निघाले होते. त्यांच्या बसला आज पहाटे कानपूरजवळ अपघात झाला. अपघाताची माहिती मिळताच जिल्हाधिकारी आयुष प्रसाद यांनी कानपूर जिल्हाधिकारी यांच्याशी संपर्क साधला. त्यानंतर जखमींना कानपूरच्या शासकीय वैद्यकीय महाविद्यालय व रुग्णालयात दाखल करण्यात आले आहे. त्यांच्या मदतीसाठी अपर जिल्हाधिकारी दर्जाच्या अधिकाऱ्याची नियुक्ती करण्यात आली आहे.
निफाडचे आमदार दिलीप बनकर यांनीही जिल्हाधिकारी आयुष प्रसाद तसेच कानपूर येथील प्रशासनाशी संपर्क साधत अपघातातील जखमींची विचारपूस करून त्यांच्यावर आवश्यक ते वैद्यकीय उपचार त्वरीत मिळण्याबाबत सूचित केलं आहे.
नाशिकमध्ये सद्गुरुनगर येथे चोरीची घटना
नाशिकरोड सद्गुरुनगर येथे निकुंभ कुटुंबाच्या घरी चोरीची घटना घडली असून चोर सीसीटीव्ही कॅमेऱ्यात कैद झाले आहेत. ही चोरी पहाटे ४ वाजून १९ मिनिटाला झाली असून तीन चोरांनी दुचाकीवर हुडी घालून येत घराचे कुलूप तोडून आत प्रवेश केला. घरातील सोने आणि काही रक्काम त्यांनी चोरून नेली आहे. या घटनेनंतर पोलिसांनी रात्रीची गस्त वाढवावी अशी मागणी स्थानिक करत आहेत