तालुक्यात थंडी जीवघेणी ठरत असून, देवगाव (ता. निफाड) येथील २२ वर्षीय तरुणाचा थंडीत काकडून मृत्यू झाल्याची घटना शुक्रवारी समोर आली आहे.
काय घडलं?
देवगाव येथील पाटबंधारे विभागाच्या कार्यालयाजवळ शुक्रवारी सकाळी आठच्या सुमारास समीर दौलत सोनवणे (वय २२) हा तरुण मृतावस्थेत आढळून आला. पोलिसपाटील सुनील बोचरे यांनी लासलगाव पोलिसांना तत्काळ माहिती दिली. शवविच्छेदनाच्या प्राथमिक अहवालानुसार अतिथंडीमुळे हृदयविकाराच्या तीव्र झटक्या तरुणाचा मृत्यू झाल्याचे निष्पन्न झाले आहे. वाढत्या थंडीच्या पार्श्वभूमीवर नागरिकांनी विशेषतः रात्रीच्या वेळी काळजी घ्यावी, असे आवाहन वैद्यकीय तज्ज्ञांनी केले आहे.
निफाडचे तापमान गहू कृषी संशोधन केंद्रात शुक्रवारी ६.१ अंश सेल्सिअस नोंदले गेले असून, कडाक्याच्या थंडीमुळे देवगाव (ता. निफाड) येथील २२ वर्षीय तरुणाचा मृत्यू झाल्याची घटना समोर आली आहे.नाशिकचेही तापमान शुक्रवारी ९.१ अंश सेल्सिअसपर्यंत घसरले. तापमानाचा पारा गुरुवारी १० अंशापर्यंत होता. आहे. गेल्या चोवीस तासांत हे तापमान दोन अंश सेल्सिअसने, तर गेल्या पाच दिवसांत पाच ते सहा अंश सेल्सिअसने तापमान कमी झाले आहे. हीच स्थिती जिल्हाभरात असून, थंडी पुन्हा परतल्याने काळजी घेण्याचे आवाहन वैद्यकीय तज्ज्ञांनी केले आहे.
निफाडचा पारा ६.१ अंशांवर
निफाड : निफाड तालुक्यात शुक्रवारी निफाड गहू कृषी संशोधन केंद्रात ६.१ अंश सेल्सिअस इतक्या कमी तापमानाची नोंद झाल्याने निफाडकर कडाक्याच्या थंडीने गारठले आहेत. यंदा गुरुवारी प्रथमच ५.९ अंश सेल्सिअस इतक्या कमी तापमानाची नोंद झाली होती. तालुक्यात गुरुवारी रात्री प्रचंड गारठा असल्याने रस्त्यावर वर्दळही घटल्याचे पाहायला मिळाले.
निफाडमध्ये शुक्रवारी पहाटेपासून वातावरणात कडाक्याची थंडी जाणवली. दुपारी बारापर्यंत कडाक्याच्या थंडीची अनुभूती होत होती. ही थंडी गहू, कांदा या व इतर रब्बी पिकांना पोषक ठरणार आहे. मात्र कडाक्याची थंडी वाढत असल्याने द्राक्ष बागायतदारांमध्ये चिंतेचे वातावरण पसरले आहे.