उत्तर पूर्व मुंबईत यंदा महापालिका निवडणुकीत उतरलेल्या उमेदवारांमध्ये सर्वाधिक भाजपचेच उमेदवार कोट्यधीश आहेत. यामध्ये माजी नगरसेवक असलेले प्रकाश गंगाधरे, प्रभाकर शिंदे, रितू तावडे, नील सोमय्या आदींचा समावेश आहे. या उमेदवारांच्या संपत्तीत २०१७ च्या तुलनेत २०२५ मध्ये लक्षणीय वाढ झाली आहे. प्रभाग क्रमांक १०५ मधील भाजपच्या अनिता वैती यांच्याकडे एकूण २८ कोटी ७१ लाख रुपयांची मालमत्ता आहे. या उमेदवारांनी निवडणुकीसाठी सादर केलेल्या प्रतिज्ञापत्रातून ही माहिती समोर आली आहे.
प्रभाग क्रमांक १०४ मधून भाजपचे माजी नगरसेवक प्रकाश गंगाधरे हे पुन्हा निवडणुकीच्या रिंगणात उतरले आहेत. गंगाधरे यांची एकूण मालमत्ता १२ कोटी ८८ लाख ७६ हजार रुपये आहे. त्यांची स्थावर मालमत्ता ११ कोटी ३५ लाख रुपये असून, त्यांच्याकडे तीन वाहने आहेत. यामध्ये इनोव्हा हायक्रोस वाहनाची किंमत ३८ लाख रुपये आहे. २०१७ मध्ये निवडणूक लढवताना त्यांनी २ कोटी ४७ लाख ८८ हजार ६४० रुपये मालमत्ता दाखवली होती.
प्रभाग क्र. १०५ मधून ६० वर्षीय अनिता वैती या भाजपच्या उमेदवार असून त्यांचे शिक्षण दहावीपर्यंत आहे. वैती यांच्या कुटुंबाचे वार्षिक उत्पन्न ११ लाख ९४ हजार ७२२ रुपये असून एकूण मालमत्ता २८ कोटी ८८ लाख १० हजार रुपये असून, त्यात स्थावर मालमत्ता २८ कोटी ७१ लाख रुपये आहे.
प्रभाग क्र. १०६ मध्ये ६७ वर्षीय प्रभाकर शिंदे निवडणुकीच्या रिंगणात पुन्हा उतरले आहेत. माजी गटनेते असलेले शिंदे यांच्या मालमत्तेही वाढ झाली आहे. २०१७ मधील निवडणुकीवेळी त्यांची एकूण मालमत्ता ११ कोटी ९० लाख १ हजार २४५ रुपये होती. आता त्यांची एकूण मालमत्ता १७ कोटी ६३ लाख रुपये झाली आहे. त्यापैकी जंगम मालमत्ता १० कोटी ५१ लाख ३७ हजार असून, उर्वरित स्थावर मालमत्ता आहे. त्यांच्या नावे दोन आणि पत्नीच्या नावे एक वाहन आहे.
भाजपचे माजी खासदार किरीट सोमय्या यांचा मुलगा व माजी नगरसेवक नील सोमय्या प्रभाग क्रमांक १०७ मधून निवडणूक लढवत आहे. उच्चशिक्षित असलेल्या नील सोमय्या यांची आता एकूण मालमत्ता ९ कोटी ८९ लाख २१ हजार ८७२ रुपये आहे. यापैकी जंगम मालमत्ता ५ कोटी ७२ लाख ८० हजार रुपये असून, उर्वरित स्थावर मालमत्ता आहे. २०१७ मध्ये निवडणूक लढवताना त्यांची मालमत्ता १ कोटी ९९ लाख ३७ हजार ८०९ रुपये होती. त्यांच्याकडे २२ लाख ६४ हजार रुपये किंमतीची महिंद्रा थार गाडी आहे.
भाजपच्या प्रभाग क्रमांक १३२ मधील उमेदवार आणि माजी नगरसेविका रितू तावडे यांची एकूण मालमत्ता ५ कोटी २६ लाख ६७ हजार रुपये असून त्यांच्याकडे ४६ लाख ५० हजार रुपये किंमतीची फॉर्च्यूनर टोयाटो, हुंदाई वाहन, एक दुचाकीही आहे. २०१७ मध्ये निवडणूक लढवताना त्यांची मालमत्ता ३ कोटी ५८ लाख ८३ हजार ५७४ रुपये होती. राष्ट्रवादी काँग्रेस (शप) पक्षातून भाजपमध्ये गेलेल्या राखी जाधव यांची एकूण मालमत्ता ३ कोटी ८० लाख ६८ हजार रुपये आहे.