पुण्यात आर्थिक वादातून एका तरुणाचे अपहरण करून, त्याला विवस्त्र करून बेदम मारहाण केल्याची घटना घडली. आरोपींनी या घटनेचे मोबाइलमध्ये चित्रीकरण करून, हा व्हिडिओ सोशल मीडियावर प्रसारित करण्याचा धमकी दिली. याशिवाय तरुणावर पिस्तुलातून गोळ्याही झाडल्या. कात्रज–कोंढवा रस्त्यावरील गोकुळनगर परिसरात ही घटना घडली. याप्रकरणी येवलेवाडी पोलीस ठाण्यात नऊ जणांविरुद्ध गुन्हा दाखल करण्यात आला असून, पसार झालेल्या आरोपींचा पोलीस शोध घेत आहेत.
याबाबत कोंढवा भागात राहणाऱ्या 31 वर्षीय वाहन खरेदी-विक्रीचा व्यवसाय करणाऱ्या तरुणाने येवलेवाडी पोलीस ठाण्यात तक्रार दिली. त्यावरून आयुष कामठे, अभी म्हस्के, अभी पाटील, मंगेश माने, कौशल उर्फ ऋषी मोरे यांच्यासह नऊ जणांविरुद्ध गुन्हा दाखल करण्यात आला आहे. पोलिसांनी दिलेल्या माहितीनुसार, आरोपी तक्रारदाराच्या ओळखीचे असून, त्यांच्यात आर्थिक व्यवहारातून वाद सुरू होता. या वादातून 31 डिसेंबरला आरोपींनी तक्रारदाराला मारहाण करून, जबरदस्तीने कारमध्ये बसवून अपहरण केले. रात्री सुमारे 11 वाजेच्या सुमारास आरोपींनी तक्रारदाराला कात्रज-कोंढवा रस्त्यावरील गोकुळनगर परिसरातील मोकळ्या मैदानात नेले. या घटनेनंतर तक्रारदार भीतीमुळे गप्प राहिला होता. मात्र, रविवारी त्याने पोलिसांकडे तक्रार दिली. त्यानंतर वरिष्ठ पोलीस निरीक्षक अमर काळंगे यांनी घटनास्थळी भेट दिली.
शहरात तरुण पोरांचा धाडसी दरोडा
भरदिवसा सराफी पेढीवर दरोडा घालून 52 लाख रुपयांचे दागिने लुटणाऱ्या टोळीला गुन्हे शाखेने अवघ्या काही दिवसांत अटक केली. या कारवाईत तीन आरोपींना अटक करण्यात आली असून, त्यांच्या तीन अल्पवयीन साथीदारांना ताब्यात घेण्यात आले आहे. चोरट्यांकडून 224 ग्रॅम सोन्याचे व 183 ग्रॅम चांदीचे दागिने जप्त करण्यात आले आहेत.
प्रवीण महादेव शिंदे (वय 18, रा. फुरसुंगी, हडपसर), राजदीप संतोष जगताप (वय 21, रा. लोणी काळभोर) आणि भावेश राजेश चव्हाण (वय 20, रा. रवीदर्शन, उन्नतीनगर, हडपसर) अशी अटक केलेल्या आरोपींची नावे आहेत. याच गुन्ह्यात तीन अल्पवयीन मुलांना ताब्यात घेण्यात आले आहे. पुणे-सोलापूर महामार्गावरील शेवाळवाडी परिसरात एका सराफी पेढीत शनिवारी 3 जानेवारी सायंकाळी साडेपाचच्या सुमारास हा दरोडा पडला होता. आरोपी शिंदे, जगताप, चव्हाण आणि त्यांचे अल्पवयीन साथीदार यांनी आधी परिसराची पाहणी केली होती. त्या वेळी सराफी पेढीत सराफ व्यावसायिक एकटेच होते.