इंदिरानगर परिसरातील गोदावरी अपार्टमेंटमध्ये बुधवारी 31 डिसेंबर रोजी दुपारी सुमारे तीन वाजेच्या सुमारास पाचव्या मजल्यावरून पडल्याने मोठ्या प्रमाणात रक्तस्त्राव होऊन एका 40 वर्षीय शिक्षिकेचा दुर्दैवी मृत्यू झाल्याची घटना घडली. याप्रकरणी इंदिरानगर पोलीस ठाण्यात आकस्मिक मृत्यूची नोंद करण्यात आली आहे.
स्वाती दीपक पवार (वय 40, रा. गोदावरी अपार्टमेंट, कमोदनगर, इंदिरानगर, नाशिक) असं मृत शिक्षिकेचं नावआहे. घटनेनंतर पती दीपक पवार यांनी त्यांना तातडीने उपचारासाठी रुग्णालयात दाखल केले; मात्र डॉक्टरांनी तपासणीनंतर त्यांना मृत घोषित केलं. दरम्यान, सदर महिला अपार्टमेंटच्या उंचावरून पडल्या, की त्यांनी आत्महत्या केली, असा प्रश्न उपस्थित केला जात आहे. घटनेचा पुढील तपास इंदिरानगर पोलीस ठाण्याचे पोलीस महेश साळी करीत आहेत.
विद्यार्थिनीची आत्महत्या
शहरात अकरावीत शिकणाऱ्या एका 17 वर्षीय विद्यार्थिनीने बुधवारी 31 डिसेंबर रोजी गळफास घेऊन आत्महत्याकेली. मल्हारखान झोपडपट्टी परिसरात ही घटना घडली असून, सरकारवाडा पोलिसांनी अकस्मात मृत्यूची नोंद केली आहे. तिचे कुटुंब मोलमजुरीवर उदरनिर्वाह करते. बुधवारी सायंकाळी घरात कोणी नसताना तिने गळफास घेतला. तिला तत्काळ जिल्हा रुग्णालयात दाखल करण्यात आले. परंतु, तिचा मृत्यू झाला.
नाशिकमधल्या ‘त्या’ हत्येचं गूढ उकललं; धक्कादायक कारण
मित्रांच्या ‘थर्टी फर्स्ट’ पार्टीसाठी पैशांची आणि महागड्या मोबाइलची लालसा तरुणाच्या जीवावर बेतली. मोहदरी गावाच्या शिवारातील पास्ते घाटात आढळलेल्या तरुणाच्या खून प्रकरणाचा छडा लावत सिन्नर पोलिसांनी अवघ्या 24 तासांत अल्पवयीनासह एका संशयितास ताब्यात घेतलं.
नेमकं काय घडलं तरी काय?
मंगळवारी दि. 30 डिसेंबर रोजी पास्ते घाटात रस्त्याच्या कडेला रक्तबंबाळ अवस्थेत एका पुरुषाचा मृतदेह आढळून आला होता. प्राथमिक तपासात धारदार शस्त्राचे वार आणि गळा आवळल्याचं स्पष्ट झालं होतं. एमआयडीसी सिन्नरचे पोलीस निरीक्षक भरत जाधव व सिन्नर पोलीस ठाण्याचे पोलीस निरीक्षक हेमंतकुमार भामरे यांनी घटनास्थळी धाव घेतली. निफाड उपविभागीय पोलीस अधिकारी कांतीलाल पाटील यांनीही घटनास्थळी भेट देत तपासाला गती दिली.