बीड जिल्ह्यातून एक धक्कादायक घटना समोर आली असून, लग्नाचं आमिष दाखवून एका 17 वर्षीय अल्पवयीन मुलीवर अत्याचार केल्याप्रकरणी शिवाजीनगर पोलिसांनी आरोपीला अटक केली आहे. या घटनेमुळे शैक्षणिक परिसरात खळबळ उडाली आहे. बीड शहरातील एका महाविद्यालयात शिक्षण घेणाऱ्या 17 वर्षीय पीडित मुलीची ओळख अभिषेक सुखदेव मोटे (वय 22 वर्ष, रा. उदंड वडगाव, ता. बीड) या तरुणाशी झाली होती. अभिषेक हा देखील त्याच शहरातील एका महाविद्यालयात शिक्षण घेत होता. ओळखीचे रूपांतर मैत्रीत झाल्यानंतर अभिषेकने तिला लग्नाचं आमिष दाखवून प्रेमाच्या जाळ्यात ओढले होते.
लग्नाचं आमिष दाखवून अत्याचार
आरोपीने पीडित मुलीला लग्नाचं वचन देऊन तिचा विश्वास संपादन केला. त्यानंतर त्याने तिला बीड शहरातील एका कॅफेमध्ये नेले. तसेच बीड तालुक्यातील एका लॉजवर नेऊन तिच्यावर अत्याचार केला. वारंवार होणाऱ्या या प्रकारानंतर पीडित मुलीने धाडस करून पोलिसांत तक्रार दिली.
पोलिसांनी आरोपीला बेड्या ठोकल्या
पीडितेच्या तक्रारीवरून बीड येथील शिवाजीनगर पोलीस ठाण्यात आरोपी अभिषेक मोटे याच्याविरुद्ध विविध कलमान्वये गुन्हा दाखल करण्यात आला. घटनेचे गांभीर्य ओळखून शिवाजीनगर पोलिसांनी तातडीने तपास चक्रे फिरवली आणि आरोपीला बेड्या ठोकल्या आहेत. आरोपी सध्या पोलीस कोठडीत असून, शिवाजीनगर पोलीस या प्रकरणाचा अधिक तपास करत आहेत.
विधवा महिलेसोबत धक्कादायक प्रकार
बीड जिल्ह्याच्या केज तालुक्यातील युसुफवडगाव पोलीस ठाण्याच्या हद्दीत ३५ वर्षीय विधवा महिलेवर लैंगिक अत्याचार झाल्याची गंभीर घटना उघडकीस आली आहे. या प्रकरणी ५७ वर्षीय व्यक्तीविरुद्ध गुन्हा दाखल करण्यात आला असून आरोपीला अवघ्या दोन तासात अटक करण्यात आली आहे.
मिळालेल्या अधिकच्या माहितीनुसार, सावळेश्वर (पैठण) येथील मधुकर उर्फ मदन विश्वनाथ म्हस्के (वय ५७) याने पीडित महिलेला शेतातील भाजीपाला घेऊन जाण्याच्या बहाण्याने शेतात बोलावले. सकाळच्या सुमारास ती महिला शेतात गेली असता, एकटेपणाचा गैरफायदा घेत आरोपीने तिच्यावर जबरदस्तीने लैंगिक अत्याचार केला. तसेच या घटनेची कुणाला माहिती दिल्यास जीवे मारण्याची धमकीही दिल्याचे तक्रारीत फिर्यादीने नमूद आहे. या घटनेनंतर पीडितेने केज तालुक्यातील युसुफवडगाव पोलीस ठाण्यात आरोपी विरोधात तक्रार दाखल केली. त्यानुसार आरोपीविरुद्ध गुन्हा नं ३२६/२०२५ अंतर्गत भारतीय न्याय संहितेच्या संबंधित कलमान्वये गुन्हा दाखल करण्यात आला आहे.