नागपूर जिल्हा व सत्र न्यायालयाच्या अधिकृत ई-मेल आयडीवर बॉम्बस्फोटाची धमकी देणारा मेल प्राप्त झाल्याने आज सकाळपासून खळबळ उडाली आहे. सुरक्षेच्या दृष्टीने खबरदारी म्हणून सत्र न्यायालय परिसरात तातडीने पोलिस बंदोबस्त वाढवण्यात आला असून बॉम्ब शोधक व नाशक पथक (BDDS) न्यायालय परिसरात सखोल तपास करत आहे. सुदैवाने आतापर्यंत कोणतीही संशयास्पद वस्तू आढळून आलेली नाही.
मिळालेल्या माहितीनुसार, गुरवारी आम्रपाली सकाळी जिल्हा सत्र न्यायालयाच्या ई-मेलवर एक धमकीचा मेल आला. या मेलमध्ये स्वतःला आयएसआयशी संबंधित असल्याचा दावा करण्यात आला असून नागपूर जिल्हा न्यायालयाची इमारत दुपारी दोन वाजेपर्यंत उडवून देण्यात येईल, अशी धमकी देण्यात आली होती. तसेच त्या वेळेपर्यंत वकील, कर्मचारी व नागरिकांना इमारतीच्या बाहेर काढावे, अन्यथा गंभीर परिणाम भोगावे लागतील, असा इशाराही देण्यात आला होता.
या धमकीच्या मेलमध्ये पुढे TNLA या संघटनेचा उल्लेख करण्यात आला असून ‘गलना रमेश’ असे नाव नमूद करण्यात आले आहे. मेलमध्ये न्यायालयाची मुख्य इमारत तसेच न्यायालयाधीशांचे कक्ष बॉम्बने लक्ष्य केले जातील, असेही स्पष्टपणे लिहिण्यात आले होते. हा संदेश प्राप्त होताच बीडीए (बॉम्ब डिस्पोजल अथॉरिटी) अधिकाऱ्यांनी तातडीने वरिष्ठ अधिकारी व पोलिस यंत्रणेला माहिती दिली. त्यानंतर खबरदारीचा उपाय म्हणून न्यायालय परिसरात ये-जा नियंत्रित करण्यात आली. काही काळासाठी न्यायालयीन कामकाजावरही परिणाम झाला. पोलिस, बॉम्ब शोधक पथक, श्वान पथक तसेच गुप्तचर विभागाचे अधिकारी घटनास्थळी दाखल झाले असून संपूर्ण परिसराची बारकाईने तपासणी करण्यात येत आहे.
अधिकाऱ्यांनी सांगितले की, अशा प्रकारचा धमकीचा मेल नागपूर जिल्हा व सत्र न्यायालयाला पहिल्यांदाच प्राप्त झाला आहे. त्यामुळे कोणताही धोका गृहित धरून पूर्ण सतर्कता बाळगण्यात येत आहे. प्राथमिक तपासात हा मेल कुणाच्या खोडसाळपणातून पाठवण्यात आला असण्याची शक्यता वर्तवली जात असली, तरी त्यामागे गंभीर कट आहे का, याचाही सखोल तपास केला जात आहे. दरम्यान, नागरिकांनी अफवांवर विश्वास न ठेवता पोलिस प्रशासनाला सहकार्य करावे, असे आवाहन करण्यात आले आहे. तपास पूर्ण होईपर्यंत न्यायालय परिसरात कडेकोट सुरक्षा ठेवण्यात येणार असल्याचे पोलिसांनी स्पष्ट केले आहे.