राष्ट्रवादी काँग्रेसच्या नेत्या रुपाली पाटील ठोंबरे यांचा पक्षाचा शहर कार्याध्यक्ष पदाचा राजीनामा दिला आहे. पक्षामधील नाराजीनंतर रुपाली पाटील यांनी थेट पक्षश्रेष्ठी अजित पवार यांच्याकडे राजीनामा सुपूर्द केला. अजित पवार यांच्यासोबत बैठक झाल्यानंतर पक्षातून बाहेर पडण्यासंदर्भात निर्णय घेणार असल्याचं त्यांनी स्पष्ट केलं. रुपाली पाटील या पुण्यातील माजी नगरसेविका आहेत. राज ठाकरे यांच्या महाराष्ट्र नवनिर्माण सेनेला रामराम ठोकून २०२१ मध्ये रुपाली पाटलांनी राष्ट्रवादीत प्रवेश केला होता.
नुकतीच रुपाली पाटील यांनी शिवसेना खासदार श्रीकांत शिंदे यांची भेट घेतली होती. त्यामुळे त्या उपमुख्यमंत्री एकनाथ शिंदे यांच्या नेतृत्वातील शिवसेनेत प्रवेश करण्याची चर्चा होती. मात्र ही भेट राजकीय नसल्याचं सांगत त्यांनी याआधी ‘घड्याळ’ सोडण्याच्या चर्चा फेटाळून लावल्या होत्या. परंतु पक्षांतर्गत वादामुळे अस्वस्थ असलेल्या रुपाली पाटील राष्ट्रवादीला रामराम ठोकणं निश्चित मानलं जात होतं.
रुपाली विरुद्ध रुपाली
रूपाली चाकणकर आणि रूपाली पाटील यांच्यामधील अंतर्गत वाद काही दिवसांपासून उफाळून आले आहेत. बीडमधील डॉक्टर तरुणीच्या आत्महत्या प्रकरणात त्यांना न्याय न देता, त्यांच्या चारित्र्यावर आघात करण्यात आल्याचा दावा करत या अन्यायाविरुद्ध आपण आवाज उठवणार, माझा आवाज दाबला जाईल? असा सवाल रुपाली पाटील यांनी केला होता. आमचा इतिहास अन्याय सहन करणाऱ्यांचा नाही, तर गरज पडल्यास “ख्वाडा” करणाऱ्यांचा आहे, असा इशारा रुपाली पाटील यांनी चाकणकर यांना दिल्याने दोन रुपालींमधील पक्षांतर्गत वाट चव्हाट्यावर आला होता.
प्रवक्ते आणि स्टार प्रचारकांच्या यादीतून डच्चू
स्थानिक स्वराज्य संस्था आणि महापालिका निवडणुकांच्या पार्श्वभूमीवर उपमुख्यमंत्री अजित पवार यांनी नगर परिषद आणि नगर पंचायत निवडणुकांसाठी राष्ट्रवादी काँग्रेस पक्षाच्या स्टार प्रचारकांची यादी जाहीर केली होती. आधी प्रवक्त्यांच्या यादीत स्थान न मिळालेल्या आमदार अमोल मिटकरी यांची स्टार प्रचारकांच्या यादीत वर्णी लागली, परंतु रुपाली पाटील ठोंबरे यांना स्टार प्रचारकांच्या यादीतूनही डच्चू मिळाला होता. त्यामुळे रुपाली पाटील यांची पक्षातून गच्छंती निश्चित मानली जात होती.