मुंबईकरांसाठी वाहतुकीसाठी आणखी एक मार्ग तयार होणार आहे. वर्सोवा ते दहिसर हा सागरी किनारा मार्ग अर्थात कोस्टल रोड होणार असून या मार्गासह त्याच्याशी संलग्न अन्य मार्ग असणार आहेत. या प्रकल्पांसाठी मुंबई महापालिका मोठ्या प्रमाणात भूसंपादन करणार आहे. त्यासाठी सल्लागाराची नियुक्ती महापालिका करणार असून या कामासाठी निविदा काढण्यात आली आहे. महापालिका एकूण 350 हेक्टर भूसंपादन करणार आहे.
सहा टप्प्यांत होणार वर्सोवा ते दहिसर कोस्टल रोड –
मरिन ड्राइव्ह ते वरळीदरम्यान सागरी किनारा मार्गाचे काम पूर्णत्वास आल्यानंतर, आता मुंबई महापालिकेकडून वर्सोवा ते दहिसर या सागरी किनारा मार्गाचं काम केलं जात आहे. हा मार्ग काही पट्ट्यात दुहेरी उन्नत मार्ग, तर काही पट्टयात खाडीखालून बोगद्याद्वारेही होणार आहे. गोरेगाव-मुलुंड लिंक रोडचीही जोड देऊन पश्चिम आणि पूर्व द्रुतगती मार्गावरील वाहनचालकांना दिलासा देण्याचा प्रयत्न असणार आहे. सहा टप्प्यांत होणाऱ्या या प्रकल्पाचा खर्च 16 हजार 621 कोटी रूपये आहे.
वर्सोवा-दहिसर सागरी किनारा मार्ग 22 किमी लांबी
वर्सोवा-दहिसर सागरी किनारा मार्ग साधारण 22 किलोमीटर लांबीचा आहे. यामुळे प्रवास वेगवान आणि झटपट होण्यास मदत मिळणार आहे.
महापालिकेच्या भूखंडावरील या सागरी किनारा मार्गाचे काम काही प्रमाणात सुरू झाले आहे. मात्र सरकारी जमिनीबरोबरच खासगी जमिनही या प्रकल्पासाठी लागणार आहे. त्यासाठी भूसंपादनासह विविध परवानग्या महापालिकेला घ्याव्या लागणार आहेत, या परिसरात या प्रकल्पाशी संलग्न असा मढ ते वर्सोवा खाडी पूल होणार आहे, तर मालाड पश्चिम परिसर आणि कांदिवलीत वाहतूककोंडीचा प्रश्न सोडवण्यासाठी मालाड-मार्वे-मनोरी रस्ता रुंदीकरण कामेही होतील. तसेच सेवा रस्ते, विकास नियोजनांतर्गत येणाऱ्या विविध रस्त्यांचीही कामे होणार आहेत.
सी-लिंकसाठी 350 हेक्टर भूसंपादन
सागरी किनारा मार्गासह त्याच्याशी संलग्न कामासाठी एकूण 350 हेक्टर भूसंपादन करावं लागणार आहे. यामध्ये सागरी किनारा मार्गासाठी सुमारे 200 हेक्टरचं भूसंपादन आहे. त्यामुळे भूसंपादनाच्या कामासह विविध मंजुरी घेण्यासाठी महापालिकेने सल्लागार नियुक्त करण्याचा निर्णय घेतला आहे. सल्लागार नेमण्यासाठी महापालिकेने निविदाही काढली आहे.