गेल्या दहा महिन्यांपासून दहा वर्षांची मुलगी पोटदुखीने हैराण होती. औषधोपचार करूनही तिला आराम मिळत नव्हता. अखेर सिम्बायोसिस रुग्णालयातील बाल व नवजात लॅप्रोस्कोपिक सर्जन डॉ. कल्पेश पाटील यांच्या सल्ल्यानुसार तिला दाखल करण्यात आले. तपासणीत तिच्या पोटाच्या वरच्या भागात एक मोठा गोळा असल्याचे डॉक्टरांना जाणवले. सीटी स्कॅनमध्ये हा गोळा पोटात पूर्णपणे पसरलेला आणि लहान आतड्यांपर्यंत गेलेला असल्याचे स्पष्ट झाले.
दहा महिन्यांपासून पोटाच्या त्रासाने त्रस्त असलेल्या एका दहा वर्षांच्या मुलीच्या पोटातून डॉक्टरांनी तब्बल २८० ग्रॅम वजनाचा केस आणि कापसाच्या दोऱ्यांचा गोळा यशस्वीरीत्या बाहेर काढला आहे. ‘रपन्जेल सिंड्रोम’ या दुर्मिळ आजारामुळे हा गोळा तिच्या लहान आतड्यांपर्यंत आणि पित्ताशयापर्यंत पोहोचला होता, ज्यामुळे तिच्या शरीरात गुंतागुंत निर्माण झाली होती. लवळे येथील सिम्बायोसिस रुग्णालय आणि संशोधन केंद्रात अडीच तास चाललेल्या गुंतागुंतीच्या शस्त्रक्रियेनंतर मुलीची प्रकृती आता स्थिर आहे.
यानंतर तातडीने शस्त्रक्रिया करण्याचा निर्णय घेण्यात आला. डॉ. पाटील आणि त्यांच्या पथकाने सुमारे अडीच तास चाललेल्या शस्त्रक्रियेत केस आणि कापसाच्या दोऱ्यांचा घट्ट झालेला २८० ग्रॅम वजनाचा गोळा बाहेर काढला. शस्त्रक्रियेदरम्यान काही दोरे पित्ताशयापर्यंत पोहोचल्याचे दिसून आले, ज्यामुळे ही घटना अधिक दुर्मिळ ठरली. शस्त्रक्रियेनंतर मुलीला अतिदक्षता विभागात ठेवण्यात आले. सातव्या दिवशी आतड्यात कोणतीही गळती नसल्याची खात्री झाल्यावर तिला द्रव आहार सुरू करण्यात आला. आठव्या दिवशी तिच्या मलावाटे काही दोरे बाहेर आले, जे आतड्यातील उरलेले पदार्थ असावेत, असे डॉक्टरांनी सांगितले.
‘रपन्जेल सिंड्रोम’ हा एक दुर्मिळ आजार आहे. ज्या व्यक्तींना केस खाण्याची सवय (ट्रायकोफॅगिया) असते, त्यांच्या पोटात केसांचा एक गोळा तयार होतो. हा गोळा आतड्यांपर्यंत पसरू शकतो. मात्र, या मुलीच्या पोटात तयार झालेला गोळा पित्ताशयापर्यंत पोहोचल्याने ही शस्त्रक्रिया अत्यंत दुर्मिळ ठरली.