पुणे रेल्वे स्थानक हे देशातील सर्वाधिक वर्दळीच्या स्थानकांपैकी एक आहे. दररोज लाखो प्रवासी या स्थानकावरून प्रवास करतात. त्यामुळेच प्रवाशांना अनेक अडचणींना आणि गैरसोयींना सामोरे जावे लागते. यासोबतच चोरीसारख्या गुन्ह्यांचे प्रमाणही वाढले आहे. तक्रार केल्यानंतर तत्काळ समाधान मिळत नसल्याने प्रवासी अनेकदा दुर्लक्ष करतात. मात्र, आता या सर्व समस्यांवर तोडगा म्हणून पुणे रेल्वे प्रशासनाने एक मोठा निर्णय घेतला आहे, प्रवाशांसाठी ‘वॉर रूम’ स्थापन करण्याचा.
काय आहे हे वॉर रूम?
या वॉर रूमचे उद्दिष्ट म्हणजे प्रवाशांच्या तक्रारी आणि अडचणींवर त्वरित कारवाई करून त्यांचे निराकरण करणे. यासाठी अत्याधुनिक डिजिटल तंत्रज्ञानाचा वापर करण्यात येणार आहे. या वॉर रूममध्ये एकूण 10 कर्मचारी 24 तास तैनात असतील. प्रवाशांकडून कोणतीही तक्रार आली की ती डिजिटल प्रणालीच्या मदतीने संबंधित विभागाकडे लगेच पाठवली जाईल. रेल्वे विभागाच्या माहितीनुसार, या तक्रारींचे निराकरण अवघ्या 20 मिनिटांत केले जाईल.
आतापर्यंत प्रवाशांना तक्रारी नोंदवण्यासाठी ‘रेल मदत’ अॅप किंवा रेल्वेच्या अधिकृत एक्स हँडलचा वापर करावा लागायचा. त्यामुळे तक्रारी विभागापर्यंत पोहोचायला आणि त्यावर कारवाई व्हायला बराच वेळ लागत होता. मात्र आता वॉर रूमच्या स्थापनेमुळे हा संपूर्ण प्रक्रियेला गती मिळणार असून, प्रवाशांच्या समस्या अधिक जलदगतीने सुटणार आहेत.
पुणे रेल्वे स्थानकावर दररोज दीड लाखाहून अधिक प्रवासी प्रवास करतात. सणासुदीच्या काळात ही संख्या आणखीनच वाढते. अशा वेळी विशेष गाड्या चालवण्यात येतात, मात्र त्यांचे नियोजन आणि व्यवस्थापन करताना अनेकदा अडचणी येतात. त्यामुळे गर्दी वाढते आणि वाहतुकीत खोळंबा होतो. या पार्श्वभूमीवर वॉर रूममुळे गर्दीवर नियंत्रण ठेवणेही अधिक सुलभ होईल.
भारतीय रेल्वेच्या मार्गदर्शनानुसार, ही वॉर रूम स्थानकावरील संपूर्ण व्यवस्थापन अधिक प्रभावी करण्यास मदत करणार आहे. गाड्या फलट्यावर येण्यापूर्वीच प्रवाशांना त्याची सूचना दिली जात आहे. तसेच, ज्या ठिकाणी गर्दी अधिक असते त्या ठिकाणी अतिरिक्त मनुष्यबळ आणि सुरक्षा जवान तैनात केले जात आहेत. यामुळे प्रवाशांची सुरक्षा आणि सुविधा दोन्ही सुनिश्चित करण्याकडे रेल्वे प्रशासनाचा भर आहे.