बाणेरसारख्या उच्चभ्रू भागात शुक्रवारी सकाळी प्रेयसीचा जीव घेण्याचा प्रयत्न केल्याची धक्कादायक घटना घडली. प्रेमसंबंध नाकारल्याच्या रागातून प्रियकराने थेट पिस्तुलातून गोळीबार करण्याचा प्रयत्न केला. मात्र, पिस्तुल लॉक झाल्याने गोळी झाडली गेली नाही. त्यामुळे तरुणी थोडक्यात बचावली.
ही घटना सकाळी दहाच्या सुमारास घडली. तक्रारदार तरुणी (वय २४) ‘एमबीए’चे शिक्षण घेत असून, बाणेरमधील खासगी ट्रेनिंग इन्स्टिट्यूटमध्ये नोकरी करते. तिचे गौरव नायडू (वय २५, रा. पिंपरी-चिंचवड) या तरुणासोबत २०२२ पासून प्रेमसंबंध होते. काही दिवसांपूर्वी तिने त्यांच्यातील नाते तोडले. त्यामुळे आरोपी संतापला होता. शुक्रवारी सकाळी आरोपी ‘डिलिव्हरी बॉय’चा गणवेश घालून इन्स्टिट्यूटच्या आवारात आला. त्याने तरुणीचा मार्ग अडवून बोलण्याचा प्रयत्न केला. तिने नकार दिल्यानंतर त्याने पिस्तूल काढून सलग तीन वेळा गोळी झाडण्याचा प्रयत्न केला. मात्र, पिस्तूल लॉक झाल्याने गोळी झाडली गेली नाही. त्यामुळे तरुणी बचावली. पिस्तूल पाहून तरुणीने आरडाओरडा केल्यानंतर कर्मचारी आणि सुरक्षारक्षक घटनास्थळी धावले.
भीतीचे वातावरण
तरुणीच्या आरडाओरड्यानंतर आरोपी दुचाकीवरून पसार झाला. दरम्यान, या प्रकारामुळे इन्स्टिट्यूटच्या आवारात घडलेल्या प्रकारामुळे भीतीचे वातावरण निर्माण झाले होते. घटनेची माहिती मिळताच परिमंडळ चारचे पोलिस उपायुक्त सोमय मुंडे आणि बाणेर पोलिस ठाण्याचे वरिष्ठ निरीक्षक चंद्रशेखर सावंत यांनी घटनास्थळी धाव घेतली.
पोलिसांच्या माहितीनुसार, इन्स्टिट्यूटची इमारत जुनी असल्याने तेथे ‘सीसीटीव्ही’ नाही. तरीही पसार झालेल्या आरोपीचा शोध सुरू आहे. गौरव नायडूवर यापूर्वीही खुनाच्या प्रयत्नाचा गुन्हा दाखल असल्याचे पोलिसांनी सांगितले. त्याचा शोध घेत सुरू होता. रात्री उशिरापर्यंत तो सापडला नव्हता.
दरम्यान, इन्स्टिट्यूटच्या आवारात पिस्तूल घेऊन आरोपी शिरल्याने भीतीचे वातावरण असून, विद्यार्थ्यांच्या सुरक्षेचा प्रश्नही यानिमित्ताने ऐरणीवर आला आहे. यापूर्वी शहरात विमाननगर येथे एका कंपनीच्या आवारात तरुणाने मैत्रिणीवर चाकूने हल्ला केला होता. यामध्ये तिचा मृत्यू झाला होता. या घटनेची दखल घेऊन राष्ट्रीय महिला आयोगाने पुणे पोलिसांना महिला सुरक्षेबाबत ठोस उपाययोजना करण्याची सूचना केली होती.