वसईमध्ये अन्न आणि औषध प्रशासनाने मोठी कारवाई करत एका रुग्णालयाच्या खोलीत विनापरवाना औषध दुकान चालवणाऱ्या व्यक्तीला पकडले. बारावी पास असलेल्या या व्यक्तीने सुमारे ८५ हजारांची औषधे साठवून ठेवली होती, जी एफडीएने जप्त केली आहेत.
वसईमध्ये अन्न आणि औषध प्रशासनाने (एफडीए) मोठी कारवाई केली आहे. एका बारावी पास व्यक्तीने रुग्णालयाच्या खोलीत परवानगी नसताना औषध दुकान थाटले होते. अन्न आणि औषध प्रशासनाने धाड टाकून ८५ हजारांची औषधे जप्त केली. या प्रकरणी अधिक तपास करून संबंधितांवर कोर्टात खटला दाखल करण्यात येईल, असे एफडीए अधिकाऱ्यांनी सांगितले.
वसईमध्ये एक व्यक्ती रुग्णालयात खोली घेऊन औषधे विकत असल्याची माहिती एफडीएला मिळाली होती. या माहितीनंतर अधिकाऱ्यांनी याबाबत अगोदर खातरजमा करण्याचा निर्णय घेतला. औषधांचे प्रिस्क्रिप्शन घेऊन एक माणूस त्या व्यक्तीकडे गेला.
त्याने औषधे विकल्याचे उघड झाले. त्यानंतर एफडीएच्या अधिकाऱ्यांनी गुरुवारी (गुरूवारी) त्या ठिकाणी छापा मारून त्यांनी ८५ हजारांची औषधांचा साठा जप्त केला, अशी माहिती सहाय्यक आयुक्त (औषध) महेश गाडेकर यांनी दिली. जप्त केलेल्या औषधांमधील दोन नमुने तपासणीसाठी पाठवण्यात आल्याचे त्यांनी सांगितले.
“मागील सात ते आठ महिन्यांपासून तो व्यक्ती औषधांची विक्री करत असल्याची बाब चौकशीमधून समोर आली आहे, तसेच संबधित व्यक्तीचे पूर्वी औषधविक्रीचे दुकान होते. मात्र, नंतर त्याने औषध विक्रीचा परवाना रद्द केला होता”असे एफडीए अधिकाऱ्यांनी सांगितले. “त्यानंतर त्याने रुग्णालयात खोली घेऊन तेथून विनापरवाना औषधांची विक्री सुरू केल्याचे एफडीएच्या अधिकाऱ्यांनी सांगितले,” असेही ते म्हणाले.
“रुग्णालयातच औषधांची विक्री होत होती, ही बाब चौकशीत उघड झाली आहे,” असे अधिकाऱ्यांनी सांगितले.
अन्न आणि औषध प्रशासनाच्या या कारवाईमुळे परिसरात खळबळ उडाली आहे. विनापरवाना औषध विक्री करणे कायद्याने गुन्हा आहे. त्यामुळे नागरिकांनी अधिकृत दुकानांमधूनच औषधे खरेदी करावीत, असे आवाहन एफडीएने केले आहे.