मंगळवेढ्यात एक धक्कादायक घटना घडली आहे. एका कडब्याच्या गंजीला आग लागली आणि त्यात एका महिलेचा मृत्यू झाला. नवऱ्याने आपल्या पत्नीचा खून करून तिचा मृतदेह कडब्यात जाळल्याचा संशय व्यक्त केला जात होता. पण या घटनेला धक्कादायक वळण मिळालं आहे. ही घटना संशयास्पद आहे, असा आरोप करत विवाहित तरुणीच्या वडिलांनी दिलेल्या तक्रारीनंतर पोलिसांनी तपास सुरू केला आणि एक वेगळीच गोष्ट समोर आली. ज्या महिलेचा मृत्यू झाला, ती जिवंत असून कराडमध्ये एका व्यक्तीसोबत सापडली आहे. हा व्यक्ती तिचा प्रियकर असल्याचा संशय पोलिसांनी व्यक्त केला आहे.
मिळालेल्या माहितीनुसार, पंढरपुरातील दशरथ दांडगे यांची मुलगी किरण हिचे लग्न पाटकळच्या नागेश सावत यांच्याशी झाले होते. त्यांना आरोही नावाची दोन वर्षांची मुलगी आहे. लग्नानंतर किरण तिच्या सासरच्या लोकांसोबत राहत होती. 14 जुलै रोजी पहाटे 3:30 वाजता एक फोन आला. किरणचे चुलत सासरे दत्तात्रेय सावंत यांनी किरणच्या वडिलांना फोन केला. “तुमची मुलगी किरणने स्वतःला पेटवून घेतले आहे, तुम्ही या,” असे त्यांनी सांगितले.
किरणचे कुटुंबीय पाटकळला पोहोचले. तिथे खूप गर्दी होती. किरणचा नवरा नागेश सावंत तिच्या वडिलांना भेटला आणि रडू लागला. त्याने सांगितले की, किरणने स्वतःला पेटवून घेतले. घरासमोर कडब्याची गंजी जळाली होती. त्या आगीत एका महिलेचा मृतदेह जळालेल्या अवस्थेत होता.
या घटनेमुळे गावात खळबळ उडाली. पोलिसांनी तपास सुरू केला. मृतदेहाचे अवशेष फॉरेन्सिक तपासणीसाठी पाठवले. किरणच्या वडिलांनी सांगितले की, “तो मृतदेह ओळखण्यापलीकडे होता. नागेश सावंत यांनी सांगितले की, मयत किरण आहे. माझ्या मुलीला कोणी मारले? याची चौकशी करा,” अशी मागणी त्यांनी केली.
पोलिसांनी अकस्मात मृत्यू म्हणून नोंद केली. मात्र नंतर किरण ही सातारा जिल्ह्यातील कराड इथं एका व्यक्तीसोबत सापडली आहे. त्यामुळे मंगळवेढ्यात घरासमोर सापडलेल्या महिलेच्या मृतदेहाचे अवशेष सोलापूरच्या फॉरेन्सिक लॅबकडे पाठवले. पोलिसांनी सांगितले की, DNA तपासणी आणि फॉरेन्सिक अहवालानंतरच त्या महिलेची ओळख पटू शकेल. त्यामुळे आता सगळ्यांचे लक्ष त्या अहवालाकडे लागले आहे.
दरम्यान, प्रियकरासोबत पळून जाण्यासाठी विवाहित महिलेने प्रियकराच्या साथीने एका दुसऱ्या महिलेचा मृतदेह आपल्या घरासमोर आणून जाळला आणि स्वत:च्या हत्येचा बनाव रचला, असं पोलीस सूत्रांकडून सांगितलं जात आहे. मात्र तपासाअंती या प्रकरणातील सत्य समोर येणार असून पोलिसांकडून वेगवान तपास सुरू आहे.