संत ज्ञानेश्वर यांच्या निस्सीम प्रेमापोटी नांदेडच्या एका उद्योजकाने ज्ञानेश्वरांच्या चरणी एक कोटी किमतीचा सोन्याचा मुकुट अर्पण केला आहे. या सोन्याच्या मुकुटाचे वजन जवळपास एक किलो आहे. भारत विश्वनाथ रामीनवार असं भाविकाच नाव असून ते एक प्रसिद्ध उद्योजक आहेत. मंगळवारी रामीनवार कुटुंबियांनी सोन्याचा मुकुट मंदिर समितीकडे सुपूर्द केला.
भारत रामीनवार आणि त्यांचे कुटुंबीय संत ज्ञानेश्वर माऊलीची भक्ती करतात. दरवर्षी आळंदी येथे माऊलींच्या पालखी सोहळ्याला सहकुटुंब सहभागी होतं असतात. शिवाय पालखी दरम्यान सेवा देखील बजावतात. ज्ञानेश्वर माऊलींवरील भक्तीपोटी उद्योजक रामीनवार यांनी मंगळवारी एक किलो वजनाचा सोन्याचा अलंकारिक मुकुट अर्पण केला आहे. ज्याची किंमत एक कोटी रुपये असल्याचे सांगण्यात येतं आहे. हा मुकुट तयार करण्यासाठी एक महिना लागल्याचे कुटुंबियांनी सांगितले. कुशल कारागिरांनी हा मुकुट तयार केला आहे. यामध्ये पारंपरिक नक्षीकाम, धार्मिक प्रतीकांची कोरीव रचना आणि आधुनिक थ्रीडी तंत्रज्ञानाचा वापर करण्यात आला आहे. शिवाय मुकुटावर कमळ, चक्र, सूर्यकिरण इत्यादी मंगल प्रतीके आहेत. रामीनवार कुटुंबियांच्या उदात्त कार्याचे कौतुक होतं आहे.
सध्या ज्ञानेश्वर माऊलीच्या पालखीला सुरुवात झाली आहे. दरवर्षी भारत रामीनवार आणि त्यांचे कुटुंबीय आळंदी येथे जाऊन सेवा बजावत असतात. हजारो वारकऱ्यांकरिता ते पिठलं भाकर, चहा बिस्किट, पाणी आदी सेवा मागील दहा वर्षांपासून बजावत आहेत.
संत ज्ञानेश्वरांचा जन्म विक्रम संवत १३३२ भाद्र कृष्णाष्टमीच्या मध्यरात्री आळंदी गावात झाला. श्री विठ्ठल पंत आणि आई रुक्मिणी यांचे ते द्वितीय पुत्र होते. त्यांना चार भावंडे होती. श्री निवृत्तिनाथ, संत ज्ञानेश्वर, सोपान देव आणि बहीण मुक्ताबाई. संत ज्ञानेश्वरांना कृष्णाचे अवतार मानले जात असे. श्री विठ्ठल पंतांचे आजोबा यवंक पंत यांचे गुरु नाथ पंथाचे संस्थापक गोरखनाथ होते. श्री निवृत्तिनाथ यांना नाथ पंथाचे दुसरे संस्थापक श्री गहिनीनाथ यांनी स्वप्नात दीक्षा दिली. त्यांची भक्ती पाहून ज्ञानदेवांनी त्यांच्या मोठ्या भावाकडून दीक्षा घेतली. सोपान देव आणि मुक्ताबाईंनी संत ज्ञानदेवांकडून दीक्षा घेतली.