नांदेडमध्ये चोरीच्या घटनेत सातत्याने वाढ होतं आहे. दररोज चोरीच्या घटना देखील घडत आहेत. त्यातच आता महिला देखील चोरीच्या घटनेत सक्रिय झाल्या असून बँकेत जाऊन शेतकऱ्यांना टार्गेट करत आहेत. चोरीची अशी एक घटना समोर आली आहे. बी-बियाणे आणि खताच्या खरेदीसाठी शेतकऱ्याने बँकेतून काढलेले पैसे एका तरुणीने चोरल्याची घटना नांदेडच्या तामसा गावातील एसबीआय बँकेत घडली आहे. चोरीची ही हातचलाकीची घटना बँकेच्या सीसीटीव्ही कॅमेरात देखील कैद झाली आहे.
नांदेडमधील हदगाव तालुक्यातील कंजारा गावचे वृद्ध शेतकरी गणपत चव्हाण हे पेरणीच्या साहित्याच्या खरेदीसाठी तामसा बाजारपेठेत गेले होते. साहित्य खरेदीसाठी पैसे काढण्यासाठी एसबीआय बँकेत गेले. आपल्या खात्यातून चव्हाण यांनी नव्वद हजार रुपये काढले आणि पिशवीमध्ये पैसे ठेवून ते खरेदीसाठी निघाले. मात्र बँकेत महिला त्यांच्या वर पाळत ठेवत होत्या. बँकेच्या गेटमधून बाहेर जातं असताना एका तरुणीने त्यांच्या पिशवी मधले पैसे चोरून घेतले. चोरीची ही घटना बँकेच्या CCTV कॅमेरात चित्रित झाली आहे. बाजारात गेल्यानंतर त्यांना आपले बँकेतून काढलेले नव्वद हजार रुपये चोरी झाल्याचे निदर्शनास आले. दरम्यान गणपत चव्हाण यांनी दिलेल्या तक्रारीवरून तामसा पोलीस ठाण्यात गुन्हा दाखल करण्यात आला. पोलीस सीसीटीव्हीच्या आधारे चोरट्या तरुणींचा शोध घेतायत.
हिमायतनगरमध्ये चोरट्याने शेतकऱ्याचे ५० हजार रुपये पळवले
नांदेड जिल्ह्यातील हिमायतनगर तालुक्यात ही चोरीची घटना घडली आहे. एसबीआय बँकेतून काढलेले शेतकऱ्याचे ५० हजार रुपये चोरट्याने पळवले. हिमायतनगर तालुक्यातील वारंगटाकळी येथील रामदास हानवते या शेतकऱ्याने एसबीआय बँकेतून बी बियाणे खरेदी करण्यासाठी ५० हजार काढले होते. ५० हजार काढून पिशवीत ठेवले असता, चोरट्याने त्यांच्या पिशवीतील ५० हजार काढून चोरटा पसार झाला . याप्रकरणी गुन्हा दाखल झाला असून पोलीस चोरट्याचा शोध घेत आहेत.
चोरटे सीसीटीव्हीमध्ये कैद होऊन ही सापडेनात
बँकेत चोरीच्या घटना नेहमी घडत असतात. आपल्या खात्यातील पैसे काढण्यासाठी नागरिक बँकेत गर्दी करीत असतात. याचा फायदा चोरटे घेत आहेत. विशेष म्हणजे बँकेतील चोरीची घटना सीसीटीव्हीमध्ये कैद होते, पण पोलिसांना चोरटे काही सापडत नाहीत. बँकेत सुरक्षा रक्षक तैनात असून त्यांच ही दुर्लक्ष दिसून येत आहे.