चिकलठाणा औद्योगिक वसाहतीमध्ये एक्सीडी इंडिया कंपनीत काम करणाऱ्या 22 वर्षीय तरुणाने कंपनीतील मशीनवर भगव्या रंगाने पाकिस्तान जिंदाबाद असा मजकूर लिहिला. या प्रकरणी त्याच्याविरुद्ध एमआयडीसी सिडको पोलिस ठाण्यात देशद्रोहाचा गुन्हा दाखल करण्यात आला असून पोलिसांनी तरुणाला अटक केली आहे. उमर गफार शेख वय २२ राहणार आयेशा पार्क नारेगाव असे अटक करण्यात आलेल्या आरोपीचे नाव आहे. उमर चे वडील मजुरी करतात. त्याला एक लहान भाऊ आहे. उमर हा खुलताबाद येथील कोहिनूर कॉलेजमध्ये शिक्षण घेतो. या कॉलेजमध्ये त्याचं बीकॉमचं तिसऱ्या वर्षाचं शिक्षण सुरू आहे.
एक्सीडी इंडिया कंपनीत जानेवारी 2025 मध्ये उमर हा डिक्स असेंबली विभागात रुजू झाला. 19 मे रोजी रात्री कंपनीतील मार्किंग मशीन वर त्याने भगव्या रंगात पाकिस्तान जिंदाबाद असे इंग्रजी मधून मजकूर लिहिला. त्यानंतर मशीनवरच पिवळ्या, पांढऱ्या, तांबड्या आणि निळ्या रंगाच्या रेषा मारल्या. उमरची शिफ्ट संपल्यानंतर तिसऱ्या शिफ्ट साठी कामगार बदलले. कामगार कामावर आल्यानंतर त्यांना मशीनवर हा मजकूर आढळून आल्यानंतर हा संपूर्ण प्रकार उघडकीस आला.
या संपूर्ण प्रकरणामुळे कंपनीत एकच खळबळ उडाली. चौकशीनंतर हा मजकूर उमर शेख या कामगाराने पुन्हा पुसून टाकल्याचे स्पष्ट झालं. कंपनीने याबाबत त्याला विचारल्यास मी गमतीने हा मजकूर लिहिला आहे असं त्याने सांगितले. या प्रकरणी कंपनीच्या अधिकाऱ्यांनी सिडको एमआयडीसी पोलीस ठाण्यात तक्रार दिली असून याप्रकरणी आरोपीला अटक करण्यात आली आहे. पोलिसांनी उमरचा लॅपटॉप, दोन सिम कार्ड, बँकेचे पासबुक यासह सिम कार्डची रिकामी पाकिटे आढळून आली असून पोलिसांनी ती जप्त केली आहेत. या प्रकरणाचा पुढील तपास पोलीस निरीक्षक गजानन कल्याणकर हे करीत आहेत.
दहशतवादी विरोधी पथकाने (एटीएस)केली चौकशी
पहलगाम हल्ल्यामुळे देशभरामध्ये पाकिस्तान विरोधात शीळ निर्माण झालेली असताना छत्रपती संभाजी नगरच्या तरुणाने पाकिस्तान जिंदाबाद हा मजकूर लिहिला. यामुळे एकच खळबळ उडाली आहे. या घटनेची माहिती मिळताच दहशतवादी विरोधी पथकाने ही उमरची चौकशी केली आहे. देशात पाकिस्तान विरोधी वातावरण असताना उमरणे पाकिस्तान जिंदाबाद का लिहिले? उमरला कोणी लिहायला सांगितले का? पैशाच्या आमिषाने हे लिहिले गेले का? यासह इतर प्रश्नांची उत्तरांचा शोध एटीएस करीत आहेत.