पुण्यातील विवाहिता वैष्णवी हगवणे हिच्या संशयास्पद मृत्यूनंतर तिच्या बाळाच्या ताब्यावरुन वाद निर्माण झाला होता. मात्र महिला आयोगाने या प्रकरणात हस्तक्षेप करत वैष्णवीच्या माहेरच्यांना अर्थात कस्पटे कुटुंबाला मोठा दिलासा दिला आहे. बाळाचा ताबा आज वैष्णवीच्या आई वडिलांकडे देण्यात येईल, अशी माहिती महाराष्ट्र राज्य महिला आयोगाने एक्सवरुन दिली.
बाळाचा ताबा कोणाकडे?
वैष्णवी हगवणेच्या बाळाचा ताबा आज तिच्या आई वडिलांकडे देण्यात येईल. हगवणे कुटुंबातील तीन आरोपींना अटक करण्यात आली असून दोघे जण फरार आहेत. अशावेळी वैष्णवी हगवणे यांचे दहा महिन्यांचे बाळ राजेंद्र हगवणे यांच्या मावस भावाकडे होते, अशी माहिती महाराष्ट्र महिला आयोगाच्या अध्यक्षा रुपाली चाकणकर यांनी दिली.
वैष्णवी हगवणे यांच्या बाळाचा ताबा आज वैष्णवीच्या आई वडिलांकडे देण्यात येईल.
हगवणे कुटुंबातील ३ आरोपी अटक आणि २ फरार असताना वैष्णवी यांचे १० महिन्यांचे बाळ राजेंद्र हगवणे यांच्या मावस भावाकडे होते…
काय आहे प्रकरण?
राष्ट्रवादी काँग्रेसच्या अजित पवार गटाचे येथील माजी तालुकाध्यक्ष राजेंद्र हगवणे यांची 24 वर्षीय सून वैष्णवी हिने राहत्या घरी गळफास घेऊन आत्महत्या केली. हुंड्यासाठी आपल्या लेकीचा शारीरिक आणि मानसिक छळ करण्यात आला. त्यामुळे तिने हे टोकाचे पाऊल उचलले, असा आरोप वैष्णवीच्या वडिलांनी केला आहे. या प्रकरणात वैष्णवीचा पती शशांकसह सासू लता आणि नणंद करिश्मा यांच्या पोलिस कोठडीत 26 मे पर्यंत वाढ करण्यात आली आहे, तर सासरा राजेंद्र आणि दीर सुशील अद्याप फरार आहेत. या घटनेमुळे पुण्यातील राजकीय आणि सामाजिक वातावरण ढवळून निघाले आहे.
राजेंद्र हगवणे यांचा मुलगा शशांक याच्याशी वैष्णवीचा विवाह झाला होता. गेल्या शुक्रवारी, 16 मे रोजी वैष्णवीने मुळशी तालुक्यातील भुकूम येथे राहत्या घरी गळफास घेऊन आत्महत्या केली. वैष्णवीचे वडील आनंद कस्पटे, रा. वाकड, यांनी हुंड्यासाठी लेकीचा छळ झाल्याने तिच्या मृत्यूस सासरची मंडळी कारणीभूत आहेत, अशी तक्रार शनिवारी बावधन पोलिसांत केली. त्यानुसार वैष्णवीचा पती शशांक, सासू लता, सासरा राजेंद्र, नणंद करिश्मा, दीर सुशील यांच्याविरोधात गुन्हा दाखल करण्यात आला आहे.