एका दुचाकीस्वारला पाठीमागून येणाऱ्या एका दुचाकीस्वाराने जोराची धडक दिली. या अपघातात दुचाकीवरील तिघेही ठार झाल्याची दुर्दैवी घटना चाकूर तालुक्यातील घरणी जवळच्या पुलाजवळ सोमवारी (19 मे) दुपारी घडली.
चाकुर तालुक्यातील घरणी येथील विठ्ठल धोंडीबा शिंदे (३५) आणि त्याची आई यशोदाबाई धोंडीराम शिंदे (६५) आणि विठ्ठलाचा मेव्हणा लालासाहेब पवार (३८) रा.तळेगाव घाट ता.आंबाजोगाई हे तिघे दुचाकी क्रमांक एम एच २४ बी.क्यू.६८३७ वरून घरणीहून चाकूरकडे येत होते. यशोदाबाई यांची प्रकृती ठिक नसल्याने त्यांच्यावर उपचार करण्यासाठी एका दुचाकीवरून हे जात होते. दरम्यान लातूरहून चाकूरकडे येणारी दुचाकी क्रमांक २६ बी.एन. ७०१२ ही पाठीमागून येऊन विठ्ठल शिंदे यांच्या दुचाकीला धडक दिली. हा अपघात एवढा भीषण होता की त्यात लालासाहेब पवार, यशोदाबाई शिंदे, विठ्ठल शिंदे हे गंभीररित्या जखमी झाले.तर दुसऱ्या दुचाकी वरील ज्ञानेश्वर संजय पांचाळ रा.सांगवी हेही गंभीररित्या जखमी झाले आहेत.
जखमींना चाकूरच्या ग्रामीण रुग्णालयात उपचारासाठी आणण्यात आले होते. दरम्यान लालासाहेब पवार हे ग्रामीण रुग्णालयात उपचार चालू असताना त्यांचे निधन झाले. तर यशोदाबाई शिंदे, विठ्ठल शिंदे यांना उपचारासाठी लातूर येथे पाठविण्यात आले होते. उपचारादरम्यान त्यांचाही मृत्यू झाला आहे. तर ज्ञानेश्वर पांचाळ यांच्या डोक्याला हेल्मेट होते. तेही गंभीरित्या जखमी झाले आहेत. त्यांच्यावर लातूर येथील खाजगी रुग्णालयात उपचार सुरू आहेत. या घटनेची माहिती मिळताच पोलीस उपनिरीक्षक पंकज निळकंठ, पोहेकॉ योगेश मरपल्ले, आत्माराम केंद्रे, बसलिंग चिद्रे यांनी घटनास्थळी धाव घेतली. जखमींना रुग्णवाहिकेतून उपचारासाठी चाकूर येथील ग्रामीण रुग्णालयात पाठविण्यास त्यांनी मदत केली. पोलिसांनी घटनास्थळाचा पंचनामा केला. अपघातामुळे वाहतूक कोंडी झाली होती. पोलिसांनी ती मोकळी करून दिली आहे.याप्रकरणी कोणीही तक्रार दिली नसल्याने पोलिसात अद्याप गुन्हा दाखल झाला नाही