कमी खर्चाचे आमिष दाखवून बारामती, अकलूज, इंदापूर आणि दौंड शहरात बनावट उच्च सुरक्षा (एचएसआरपी) नंबर प्लेटचा काळाबाजार सुरू आहे. या प्रकारच्या नंबरप्लेट बसवण्याची अंमलबाजवणी परिवहन विभागाने फिटमेंट एजन्सीच्या माध्यमातून सुरू केली. मात्र एजन्सीच्या माध्यमातूनच काम सुरू असल्याचे भासवून सर्वसामान्यांची फसवणूक केली जात आहे.
उपप्रादेशिक परिवहन कार्यालयाच्या अंतर्गत मार्च २०२५ अखेर सहा लाख १२ हजार ४७५ वाहनांची नोंद झाली असून त्यामध्ये एक एप्रिल २०१९ अगोदरच्या १४ हजार ३९७, तर एक एप्रिल २०१९ नंतर एक लाख ६७ हजार १६६ वाहनधारकांनी वाहनांना प्रत्यक्ष ‘हाय सिक्युरिटी नंबरप्लेट’ बसविल्या गेल्या आहेत.
किचकट ऑनलाइन प्रोसेस आणि त्यानंतर प्लेटसाठी सुमारे महिनाभर वाट पाहावी लागत अल्यामुळे वाहनधारकांना ‘एचएसआरपी’ नंबरप्लेट बसवण्यासाठीच्या फंदात न पडता अनेक ठिकाणी बनावट नंबरप्लेट बसवून घेतल्या जात आहेत.
‘हाय सिक्युरिटी रजिस्ट्रेशन प्लेट’ ही अॅल्युमिनियमपासून बनविलेली असते. या नंबरप्लेटच्या डाव्या कोपऱ्यात एक ‘युनिक लेसर ब्रँडेड’चा दहाअंकी पिन असतो. नंबरप्लेटवर एक होलोग्राम जोडण्यात आला असून तो क्रोमियम आधारित आहे.
स्टिकरप्रमाणे दिसणाऱ्या होलोग्राममध्ये वाहनाचा सर्व तपशील नोंद होतो. सर्वांत महत्त्वाचे म्हणजे, या नंबरप्लेटला स्नॅपलॉक असल्यामुळे बनावट पद्धतीने ती बनवता येत नाही. रस्ते आणि वाहनांसंबंधित गुन्हे रोखण्यासाठी हा निर्णय घेण्यात आला.
वस्तूंची ऑनलाइन विक्री करणाऱ्या साइटवरून १५० ते ५०० रुपयांपर्यंत एचएसआरपी प्लेटच्या नावाखाली बनावट नंबरप्लेट घरपोच मिळते. मात्र, अधिकृत नेमणूक केलेल्या एजन्सीकडून ग्राहकांना दुचाकीसाठी ५३० रुपये अधिकृत पावती आणि १२० रुपये फी असे शुल्क आकारले जाते. चारचाकींना १००० ते १३०० रुपयांत ही प्लेट मिळते. ऑनलाइन नंबरप्लेट या छत्रपती संभाजीनगर, सोलापूर आणि पुणे या भागातून येत असल्याचे दिसते.
हाय सिक्युरिटी नंबरप्लेटची प्रक्रिया
नंबरप्लेटची ऑनलाइन नोंदणी करताना वाहनाचा क्रमांक, वाहनाच्या चासीचा क्रमांक, पत्ता, मोबाइल क्रमांक अशी माहिती भरावी लागते. अर्ज सबमिट केल्यानंतर पैसे भरता येतात. त्यानंतर त्याची पावती डाउनलोड करता येते. ही प्रक्रिया पूर्ण झाल्यानंतर काही दिवसांत हाय सिक्युरिटी नंबरप्लेट मिळते. नागरिकांनी या प्रक्रियेचाच अवलंब करावा, असे आवाहन परिवहन विभागाने केले आहे.