मुंबईतील एका तरुणीने ब्रेकअपच्या भीतीने सायबर फसवणुकीमध्ये साडेतीन लाख रुपये गमावल्याचा विचित्र प्रकार घडला आहे. आपला प्रियकर आपल्याशी नीट वागत नसल्याने सदर तरुणी अस्वस्थ होती. प्रियकराचे इतर कुणावर तरी प्रेम असावे, असा तिला संशय होता. मनात सातत्याने नको तेच विचार येत असल्याने तिने सोशल मीडियावरील एका जाहिरातीच्या माध्यमातून मदत घेण्याचं ठरवलं. ‘ऑनलाइन भविष्य जाणून घ्या’ अशी जाहिरात या तरुणीच्या नजरेस पडली. तिथे आपली खासगी माहिती देऊन रितसर नोंदणी केल्यावर तिने प्रियकराबाबत कथित ज्योतिषांना विचारले. मात्र तुझ्यावर आणि तुझ्या प्रियकरावर काळी जादू करण्यात आली आहे, असे सांगून पूजाविधीसाठी तिच्याकडून तब्बल साडेतीन लाख उकळण्यात आले. नंतर आपली फसवणूक झाल्याचं या तरुणीच्या लक्षात आलं.
नेमकं घडलं काय?
सांताक्रूझ परिसरात राहणारी तन्वीची (बदललेले नाव) मागच्या वर्षी एका तरुणाशी ओळख झाली. ओळखीतून दोघांमध्ये मैत्री आणि नंतर मैत्रीचे रूपांतर प्रेमात झाले. सुरुवातीला या तरुणाचं तन्वीबरोबरचं वागणं ठीक होतं, मात्र काही दिवसांनी तो तिला टाळू लागला. भेटायला गेल्यावर या तरुणाचा प्रियकर तिच्याशी नीट वागत नसल्याने त्याचे दुसऱ्या मुलीवर प्रेम असल्याचा तिला संशय वाटू लागला. मनात वेगवेगळे विचार घुटमळत असताना काही दिवसांपूर्वी या तरुणीला इन्स्टाग्रामवर एक स्टोरी दिसली. ‘251 रुपये भरून करिअर आणि रिलेशनशिपची माहिती जाणून घ्या’, असं नमूद केलेली जाहिरात दिसली. प्रियकराला आपलेसे करण्यासाठी तरुणीने या जाहिरात दिलेल्या क्रमांकावर संपर्क करुन मदत घेण्याचं ठरवलं. या जाहिरातीनुसार तिने 251 रुपये भरून नोंदणी केली. त्यानंतर तरुणीने स्वत:चा आणि प्रियकराला फोटो व नावं पाठवली.
काळी जादू केल्याचा दावा
पैसे आणि माहिती पाठवल्यानंतर एका व्यक्तीचा तन्वीला फोन आला. तुमच्या प्रियकरावर कुणीतरी काळी जादू केली आहे. या काळ्या जादूच्या प्रभावामुळे तो तुमच्या सोबत राहण्यास तयार होत नाही. तो तुमच्याशी नीट वागतही नाही, असे या व्यक्तीने सांगताच तन्वी त्याच्या बोलण्यात अडकत गेली. तन्वीने कोणतीही खातरजमा न करता या अज्ञात व्यक्तीच्या बोलण्यावर विश्वास ठेवला. प्रियकरावर झालेली काळी जादू मेणबत्ती जाळून टाकते, असा दावा या व्यक्तीने केला. मात्र त्यासाठी पैसे द्यावे लागतील, असे तिला सांगण्यात आले. त्यानुसार तिने दिलेल्या बँक खात्यामध्ये पैसे या व्यक्तीला पाठविले.
प्रियकरासोबतचा संपर्क तुटला
त्यानंतर ऑनलाइन पूजाविधीचे कारण सांगून या कथित ज्योतिषाने वारंवार तन्वीकडून पैसे घेतले. सुमारे साडेतीन लाख खर्च करूनही या तरुणीच्या जीवनात काही बदल झाला नव्हता. याचदरम्यान तिचा प्रियकरासोबतचा संपर्क कायमचा तुटला. मात्र फसवणूक करणाऱ्याने ‘त्याचा फोन तुला नक्की येईल, त्यासाठी थोडे थांबावे लागेल. आणखी काही विधी करावे लागतील आणि त्यासाठी राजस्थानला यावे लागेल,’ असे या कथित भविष्यकाराने तन्वीला सांगितले. आता मात्र तन्वीला सर्व काही संशयास्पद वाटल्याने तिने अधिक माहिती काढली असता हा सर्व प्रकार फसवणुकीचा असल्याचे तिच्या लक्षात आले.
अखेर पोलीस तक्रार
तन्वीने वाकोला पोलिस ठाण्यात धाव घेत तक्रार दाखल केली. तिच्या तक्रारीवरून पोलिसांनी गुन्हा दाखल केला आहे. तांत्रिक माहितीच्या आधारे फसविणाऱ्यांचा शोध घेतला जात आहे, अशी माहिती पोलिसांनी दिली.