कुर्ला येथील घाऊक फटाके विक्री करणाऱ्या व्यावसायिकाला चांगलाच आर्थिक फटका बसला. विश्वासावर या विक्रेत्याने उल्हासनगर येथील एका दाम्पत्याला तब्बल ४० लाखांचे फटाके दिले. दिवाळीनंतर फटाक्यांचे सर्व पैसे देतो सांगून खरेदी करणारे दाम्पत्यच गायब झाले. फटाक्यांचा फसवा फटका बसल्याने विक्रेत्याने या ‘बंटी-बबली’ आणि त्यांच्या मुलीविरुद्ध कुर्ला पोलिस ठाण्यात तक्रार केली.
वांद्रे येथील व्यावसायिकाचे कुर्ला परिसरात मे. एस. के. ट्रेडिंग या नावाचे घाऊक फटाके विक्रीचे दुकान आहे. या व्यावसायिकाने केलेल्या तक्रारीनुसार, उल्हासनगर येथील सागर चिचिरीया हे पती-पत्नी दिवाळीपूर्वी त्यांच्या दुकानात आले. उल्हासनगर येथे दुकान असून, या दुकानातून फटाके विक्री करायचे असल्याचे सांगत, त्यांनी चांगल्या प्रतीच्या फटाक्यांची मागणी केली. फार मोठ्या प्रमाणात फटाके पाहिजे असल्याने विक्रेत्यानेही त्यांच्यावर विश्वास ठेवला. काही परिचयातील व्यक्ती या दोघांना ओळखत असल्याने विक्रेत्याने उधारीवर त्यांना फटाके देण्याचे मान्य केले. त्यानुसार, त्यांच्या मागणीनुसार टप्प्याटप्प्याने थोडे थोडे फटाके टेम्पोतून त्यांच्या उल्हासनगर येथील दुकानाच्या पत्यावर पाठवण्यात आले. ठराव करताना विक्री न झालेले फटाके परत करण्याची अट ठेवण्यात आली होती.
कुर्ला येथून, तसेच थेट कारखान्यातून मिळून सुमारे ४० लाख ३६ हजारांचे फटाके उल्हासनगर येथे पोहोचवण्यात आले. २०२४ मधील दिवाळी झाल्यानंतर बराच कालावधी गेला, तरी फटाक्यांचे पैसे मिळाले नसल्याने विक्रेत्याने चिचिरीया दाम्पत्याला त्यांच्या आईला फोन केला. सुरुवातीला आज देतो, उद्या देतो सांगून त्यांनी चालढकल केली.
सर्वजण टाळत असल्याचे लक्षात आल्यावर विक्रेत्याने थेट उल्हासनगर गाठले मात्र चिचिरीया काही जागेवर सापडले नसल्याचे विक्रेत्याने तक्रारीत म्हटले आहे. फसवणूक होत असल्याचे लक्षात आल्यानंतर त्याने कुर्ला पोलिस ठाण्यात जाऊन चिचिरीया पती-पत्नी आणि त्यांच्या आईविरुद्ध तक्रार केली. त्यानुसार या सर्वांवर फसवणुकीचा गुन्हा दाखल करण्यात आला आहे.