शुश्रूषा करण्यासाठी नेमलेल्या केअरटेकरने ८० वर्षांच्या व्यक्तीला नायलॉनच्या दोरीने बांधून ठेवून लुटल्याची धक्कादायक घटना कोरेगाव पार्क परिसरात घडली. केअरटेकरने ३२ हजार रुपये रोख आणि मोबाइल चोरून नेला. त्याने जाताना वृद्धाचे हातपाय बांधले. रुमालाने तोंड बांधले आणि बेडरूममध्ये डांबवून ठेवले होते. दरम्यान, वृद्धाने आरडाओरडा केल्यानंतर शेजाऱ्यांनी त्यांची सुटका केली.
कोरेगाव पार्क येथील अग्रसेन सोसायटीत हा प्रकार घडला. या प्रकरणी सोपानबाग येथे राहणाऱ्या ५६ वर्षीय व्यक्तीने तक्रार दिली आहे. त्यावरून केअरटेकरवर गुन्हा दाखल झाला आहे. ही घटना एक जानेवारीला सकाळी घडली. पोलिसांनी दिलेल्या माहितीनुसार, तक्रारदार सोपानबाग येथे राहतात. तर, त्यांचे वडील कोरेगाव पार्क येथे एकटे राहतात. वृद्धत्वामुळे त्यांची शुश्रूषा करण्यासाठी केअरटेकर नेमण्यात आला होता. त्याची नेमणूक एका संस्थेमार्फत नेमणूक करण्यात आली होती.
गेल्या २० दिवसांपासून तो त्यांच्याकडे होता. त्याने एक जानेवारीला सकाळी पावणेसात ते साडेसात या वेळेत नायलॉनच्या दोरीने वृद्धाचे दोन्ही हात-पाय बांधले. रुमालाने तोंड बांधले आणि चाकूचा धाक दाखवून, घरातील रोकड आणि वृद्धाचा मोबाइल हिसकावून घेतला. ‘तुझ्याकडे जे काही आहे, ते मला दे. नाही, तर तुला मारून टाकीन,’ अशी धमकी आरोपीने वृद्धाला दिली. त्याने वृद्धाला बेडरूममध्ये बंद केले. वृद्धाने हालचाल करीत तोंडावरील रुमाल बाजूला करीत, आरडाओरडा केला. काही वेळाने शेजाऱ्यांनी वृद्धाचा आवाज ऐकून त्यांच्या घराकडे धाव घेतली. घराचा दरवाजा उघडून बेडरूममधून वृद्धाची सुटका केली. त्यानंतर रहिवाशांनी वृद्धाच्या मुलाला आणि पोलिसांना घटनेची माहिती दिली. कोरेगाव पार्क पोलिस ठाण्यातील अधिकाऱ्यांसह गुन्हे शाखेचे उपायुक्त निखिल पिंगळे यांनी घटनास्थळी धाव घेऊन पाहणी केली.