सायबर फ्रॉड महिलेला महाराष्ट्र पोलिसांनी पुन्हा अटक केली आहे. रविवारी बिहारच्या गोपाळगंज जिल्ह्यातील लोहरपट्टी गावातून महिलेला पोलिसांनी ताब्यात घेतलं. या महिलेवर सायबर फसवणुकीचा आरोप आहे. याआधी फेब्रुवारी २०२४ मध्ये तिला हरियाणातून पोलिसांनी अटक केली होती, पण तिला पुण्यात घेऊन जाताना, ती ट्रेनमधून पळून गेली होती.
काय आहे नेमकं प्रकरण?
सायबर क्राईम करणारी महिला सानिया उर्फ सोफिया सिद्दीकीवर न्याती इंजिनिअर्स अँड कन्सल्टेंट्स कंपनीची फसवणूक केली असून तिने ४ कोटी ६ लाख रुपये लंपास केल्याचा तिच्यावर आरोप आहे. याबाबत कंपनीच्या जनरल मॅनेजर सागर जयंतीलाल यांनी बोरामधील पुणे सायबर पोलीस ठाण्यात एफआयआर दाखल केली आहे. याप्रकरणी महाराष्ट्र पोलिसांनी फेब्रुवारीमध्ये हरियाणातील मुरादाबाद येथून तिला अटक केली होती. पण पुण्याला जात असताना दुरंतो एक्सप्रेसमधून उडी मारुन ती फरारी झाली होती. त्यानंतर याप्रकरणी सहा पोलिसांचं निलंबन करण्यात आलं होतं.
सायबर गुन्हेगार आहे सोफिया सिद्दीकी
ट्रेनमधून पळून गेल्यानंतर सोफियाने लोहरपट्टीमध्ये आश्रय घेतला होता. पोलिसांनी दिलेल्या माहितीनुसार, ती अतिशय हुशार सायबर गुन्हेगार आहे. ती ट्रेनमध्ये हातकडी उघडून पळून गेली होती. त्यानंतर एक महिला हवालदार, चार पुरुष हवालदार आणि एका अधिकाऱ्याचं निलंबन करण्यात आलं होतं. आता पुन्हा एकदा महाराष्ट्र पोलिसांनी तिचा शोध घेत बिहारमधून लोहरपट्टी गावातून तिला ताब्यात घेतलं आहे.
कोण आहे ही महिला?
पोलिसांनी दिलेल्या माहितीनुसार, आरोपी महिला सानिया उर्फ गुड्डी उर्फ सोफिया सिद्दीकी ही सायबर गुन्हेगार आहे. तिला वेगवेगळ्या नावांनी ओळखलं जातं. तिने सिवानमधील नुरुहाता इथे लग्न केलं होतं, मात्र तिचा घटस्फोट झाला. घटस्फोटानंतर ती पुन्हा सायबर गुन्हेगारीमध्ये आली. कधी हरियाणात, तर कधी गोपालगंजच्या लोहारपट्टीत राहायची. पोलीस आता तिच्या टोळीतील इतर सदस्यांचा शोध घेत आहेत. सानियाच्या साथीदारांची ओळख पटवण्यासाठी आणि अटक करण्यासाठी महाराष्ट्र आणि गोपालगंज पोलीस छापेमारी करत आहेत.