मुंबई विद्यापीठातर्फे पीएच.डी. प्रवेशपूर्व परीक्षा (पेट) आणि पदव्युत्तर विधि अभ्यासक्रमाच्या (एलएलएम) प्रवेशपूर्व परीक्षेचे वेळापत्रक जाहीर करण्यात आले आहे. या वेळापत्रकानुसार २६ ऑक्टोबरपासून या दोन्ही परीक्षांसाठी ऑनलाइन प्रवेश अर्ज भरण्यास सुरुवात झाली आहे. या दोन्ही परीक्षा ऑनलाइन सेंटर बेस्ड टेस्ट (सीबीटी) पद्धतीने घेतल्या जाणार आहेत. ‘एलएलएम’ प्रवेशपूर्व परीक्षा १० नोव्हेंबर रोजी विविध परीक्षा केंद्रांवर घेण्यात येणार आहे. तर ‘पेट’ नोव्हेंबरच्या दुसऱ्या आठवड्यात घेतली जाणार असून परीक्षेची तारीख लवकरच जाहीर केली जाणार आहे. ‘एलएलएम’ प्रवेशपूर्व परीक्षेसाठी https://uomllmcet.formsubmit.in/ या संकेतस्थळावरून ३ नोव्हेंबरपर्यंत आणि ‘पेट’साठी https://uompet2024.formsubmit.in/ या संकेतस्थळावरून ३१ ऑक्टोबरपर्यंत अर्ज सादर करता येणार आहे.