पोलादपूर शहरातील तांबडभुवन भागात केशकर्तनालयामध्ये नाभिक समाजाचा पारंपरिक व्यवसाय आहे. यातील व्यवसाय करणाऱ्या तरूणाचा सोमवारी कुंभळवणेतील आडवाटेवर मृत्यू झाल्याची घटना काल मंगळवारी नातेवाईकांनी शोध घेतल्यानंतर उघडकीस आली. मयताच्या मृतदेहाशेजारी एक मेलेला सापही आढळून आल्याने मृत्यू सर्पदंशाने की अन्य कारणाने झाला? याबाबत संदिग्धता निर्माण झाली आहे.
पोलादपूर शहरातील तांबडभुवन भागात केशकर्तनालयाम चालवणारा विष्णू कदम हा कापडे खुर्द गावातील तरूण सोमवारी सलून बंद असल्याने त्याची कोसमवाडी भागातील बलुतेदारी करण्यासाठी गेला होता. हा तरूण रात्री घरी परत न आल्याने त्याच्या भावाने तांबडभुवन येथील अनिल पवार याच्या मदतीने मंगळवारी सकाळपासून विष्णूचा शोध घेतला. एका व्यक्तीला कुंभळवणे गावाच्या हद्दीतील आडवाटेने परत येताना एक इसम पायवाटेवर आडवा पडला असल्याचे दिसून आले आणि त्याने सांगितले की, तो हालचाल करत नाहीय. यामुळे अनिल पवार आणि विष्णू कदम याच्या भावाने त्या व्यक्तीच्या सांगण्यावरून आडवाटेकडे जाऊन सदरची व्यक्ती कोण आहे, याबाबत पाहिले. तो विष्णू कदम असल्याची खात्री पटली.
मयत विष्णूच्या मृतदेहाजवळच एक मेलेला साप आढळून आला. सर्पदंश झाल्यावर त्या सापाला मारल्यानंतर विष्णूदेखील मयत झाला असावा, असा प्राथमिक अंदाज वर्तवला जात आहे. या घटनास्थळावरून मृतदेहाच्या नेताना कानातून रक्त येत असल्याचं दिसून आल्याने मृत्यूच्या कारणाबाबत संदिग्धता निर्माण झाली आहे. पोलादपूर पोलिसांनी घटनास्थळाची तपासणी करून मृतदेह पोस्टमॉर्टमसाठी पोलादपूर ग्रामीण रूग्णालयामध्ये पाठवलं आहे. पोस्टमॉर्टम रिपोर्टनंतरच विष्णूच्या मृत्यूचे कारण स्पष्ट होण्याची शक्यता आहे. या प्रकरणी पोलादपूर पोलिसांनी तपास सुरू केला असून आकस्मिक मृत्यूची नोंद करण्यात आली आहे.