ओझर येथे गेल्या आठ दिवसांपूर्वी एक महिला अचानक बेपत्ता झाली अन् सर्वत्र एकच खळबळ उडाली होती. मात्र जवळपास आठ दिवसांनी शुक्रवारी या महिलेचा मृतदेह विहिरीत आढळून आल्याने सर्वांनाच मोठा धक्का बसला आहे.
आठ दिवसांपासून महिला बेपत्ता
ओझर येथील गेल्या आठ दिवसांपासून बेपत्ता असलेल्या विवाहितेचा मृतदेह अखेर सायखेडा रोडवरील शिव रस्त्यावर विहिरीत आढळून आला आहे. १९ सप्टेंबर रोजी ओझर येथील तानाजी चौकात राहणाऱ्या शोभा विलास जाधव या ३४ वर्षीय विवाहिता घरात कुणाला काही न सांगता बाहेर निघून गेल्या. त्यानंतर घरच्यांनी दिवसभर शोध घेतला मात्र त्या कुठेही दिसल्या नाहीत.
दुसऱ्या दिवशी त्यांचे पती विलास महादू जाधव यांनी पोलिसांत पत्नी बेपत्ता झाल्याची तक्रार दिली. त्यानंतर पोलिसांनी याबाबत हरवल्याची नोंद घेतल्यानंतर सर्व नातेवाईकांनी शोभा जाधव यांच्या शोधार्थ परिसर आणि नातेवाईकांच्या गावात जाऊन शोध सुरू केला. परंतु त्या कुठेही सापडल्या नाहीत.
पाण्यावर तरंगताना दिसला मृतदेह
शुक्रवारी २७ सप्टेंबर रोजी दुपारी साडेचार वाजेच्या सुमारास भडके वस्तीकडे जाणाऱ्या रस्त्याच्या डाव्या बाजूच्या विहिरीची मोटार चालू करायला तेथील शेतमजूर गेला होता. सततच्या पावसाने विहिरीतील पाण्याची पातळी वाढल्याने त्याला एक महिला पाण्यावर तरंगताना दिसून आली. त्यांनी तातडीने पोलिसांना याबाबत माहिती दिली. त्यानंतर महिलेचे पती विलास जाधव यांना तेथे बोलावण्यात आले. एकूण दिलेल्या माहितीवरून सदर व्यक्ती या शोभा जाधव असल्याचे निष्पन्न झाले. पोलिसांनी शव बाहेर काढत पंचनामा करत मृतदेह पिंपळगाव येथे शवविच्छेदनासाठी पाठवला.