एका सुशिक्षित, पगारदार आणि घटस्फोटीत महिलेची विवाह जुळवणाऱ्या संकेतस्थळावरील प्रोफाइलमुळे फसवणूक झाली. विवाह जुळवणाऱ्या संकेतस्थळावरील ‘भावी’ पतीने लग्न करण्याऐवजी तिच्याकडील लाखो रुपयांचे दागिने घेऊन पलायन केले आहे. याप्रकरणी पंतनगर पोलिसांत गुन्हा दाखल करण्यात आला आहे.
मुंबई महापालिकेत नोकरी करत असलेल्या ३३ वर्षीय प्रमिला (बदललेले नाव) हिने २०१४मध्ये लग्न केले. लग्नानंतर तिच्या पतीने वारंवार वेगवेगळी कारणे पुढे करीत, भांडण उकरून काढत घटस्फोट घेतला. त्यानंतर एकट्या पडलेल्या प्रमिला हिने दुसऱ्या जोडीदाराचा शोध सुरू केला. एका विवाह जुळविणाऱ्या संकेतस्थळावर तिने नावाची नोंदणी केली. अनेक प्रोफाइल पाहत असताना तिला विजय तरुणाचे प्रोफाइल आवडले. विजयचा सेकंडहॅण्ड गाड्या खरेदी विक्रीचा व्यवसाय होता. आर्थिक परिस्थिती चांगली आण एकुलता एक असल्याने प्रमिला हिने चॅटिंग करून त्याचा मोबाइल क्रमांक घेतला. मोबाइलवर बोलणे झाल्यानंतर दोघेही एकमेकांना भेटू लागले आणि दोघांमध्ये प्रेमसंबंध जुळले. पण प्रमिला त्याच्या मनसुब्यांपासून पूर्णत: अनभिज्ञ होती.
विजय हा प्रमिलाची काळजी घेत होता. काही हवे नको याची विचारपूस . त्याची वागणूक पाहून त्याच्यावर विश्वास बसला. कशा पद्धतीने लग्न करायचे याबाबत चर्चा सुरू असतानाच प्रमिला हिने लग्नासाठी बनविलेले विविध प्रकारचे सात लाखांचे सोन्याचे दागिने दाखवले. हे जुन्या दागिने असून माझ्याकडे डिझायनचे दे नवीन दागिने बनवून देतो, असे सांगून त्याने प्रमिलाकडून दागिने घेतले होते. इतकेच नाही तर छोटे मोठे खर्च तो हिच्या कार्डवरून करायचा. सणासाठी दागिने करायचे परिधान करायचे असल्याने तिने विजयकडे दागिन्यांची मागणी असता तो टाळाटाळ करायचा. अचानक त्याच्या वागणुकीत बदल दिसून आला आणि काळजी घेणारा विजय टाळत असल्याचे लक्षात आल्यावर आपली फसवणूक झाल्याचे प्रमिला हिच्या लक्षात आले. लाखो रुपयांचे दागिने देत नसल्याने तिने तात्काळ पंतनगर पोलिस ठाण्यात विजय याच्याविरुद्ध तक्रार केली आहे.